Mizoramah Netheralands legend Johan Neeskens a lokal dawn

Mizoram Football Association chuan kum 2023 hian Golden Jubilee a lawm dawn a, chumi denchhen chuan ruahmanna hrang hrang a siam. A programme lian pakhat chu Royal Netherlands Football Association (KNVB) nen ṭang kawpin April-ah hian World Coaches programme a buatsaih dawn a, Netherlands legend Johan Neeskens a lo kal dawn.

Football coach-te inzirna hi ni nga awh tur a ni a, Netherlands football association (KNVB) nen ṭang kawpa neih tur a ni. Hei hi MFA chuan a Golden Jubilee lawmna kawng khatah a hmang nghal ang.

KNVB hnuaia World Coaches programme hmang tur hian MFA chuan inbiakna a nei fel tawh a, Netherlands aṭangin mi panga an lo kal dawn a, an hotupa tur chu Ajax leh Barcelona star hlui Neeskens a ni ang.

Neeskens hi khawvela footballer piang tawh zinga ropui an thlanah an thlan tel ṭhin a ni a, 1974 leh 1978 World Cup final-ah khelin 1974 final-ah West Germany lamah goal a khung nghe nghe a ni. A vanglaiin Ajax leh Barcelona tan game 100 chuang a khel ve ve a, kum 2004-a, FIFA Awards Ceremony-a '125 Greatest Living Footballers' an thlan zingah a tel phak a ni.

World Coaches programme-ah hian mi 30 tan registration a tih theih dawn a, licensed coach-te puala neih tur a ni ang.

Johan Neeskens chu

• Neeskens hi September 15, 1951 khan Heemstede, Netherlands-ah a piang.

• Kum 71 mi Neeskens hian Racing Club Heemstede-ah bul a ṭan a, Ajax leh Barcelona-ah hming a chher hnuin New York Cosmos tan a khel leh bawk.

• Ajax hi European Cup vawi thum a chawi pui a, Eredivisie leh KNVB Cup vawi hnih ve ve a chawipui bawk.

• Barcelona hi Copa del Rey leh European Cup Winners' Cup a chawipui bawk.

• Netherlands tan match 49 khelin goal 17 a khung a, FIFA World Cup-ah kum 1974 leh 1978 khan pahnihna niin kum 1974-ah phei chuan Silver Boot a dawng pha a, All Star Team-ah a tel.

• Football khelh a chawlhsan hnuin Netherlands, Barcelona leh Galatasaray-ah te assistant manager hna a thawk tawh a ni.

• Neeskens hi 1974 World Cup final-a penalty khungtu kha a ni a, total football tih hlawhtlinna kawngah Rinus Michels leh Johan Cruyff te nen hmun pawimawh a chang pha a ni.