I League champion RoundGlass Punjab

RoundGlass Punjab chuan Inrinni khan Rajasthan FC chu 4-0 in an sawp a, I League champion an ni. Punjab goal lina hi Mizo tlangval Hmingthanmawia (Valpuia) khung a ni a, Valpuia hian Mumbai City chu I League-ah a champion pui tawh bawk.

Dr. Ambedkar Stadium-ah Mizo tlangval pathum Brandon VL Remdika, Freddy Lallawmawma leh Valpuia ten inkhel bul an ṭan a, Daniel Lalhlimpuia bench-ah awm bawkin inhliam vangin Samuel Lalmuanpuia squad-ah a awm lo.

RoundGlass Punjab-in bul an ṭan ṭha a, minute 16-na lekah Rajasthan defender Yash Tripathi-a'n an lamah a tilut. Goal luh theih nan Punjab forward Chencho Gyeltshen a pawimawh.

Minute 41-naah Punjab inngahna Luka Majcen chuan goal hnihna a khung a, mikhual team dinhmun a ṭha. Juan Mera-a'n minute 76-naah Punjab tan a khung belh a, Brandon-a'n keeper a hliah zarah goal-ah a lut tiin a sawi theih.

Injury time-ah substitute Juan Carlos Nellar freekick pet chu Valpuia'n ṭha zetin a tauh goal a, Punjab 4-0 in an chak.

Punjab hian match 21 aṭangin point 49 an hmu a, Sreenidi Deccan tan umphak ngaihna a awm tawh loh avangin an champion. Season tharah Punjab hian Indian Super League an khel ang.

Nimin tlai I League inkhelah Real Kashmir chuan Sreenidi Deccan chu 2-2 in an inhnehtawk. Hyderabad club Sreenidi hian champion beiseina nei hman mah se season tawp an khar ṭha lo a, Mohammedan SC an hneh loh hnuah Aizawl FC nen an inhnehtawk avangin pahnihnaah an lungawi a ṭul ta a ni.