PSG tana goal khung hnem ber Mbappe

Kylian Mbappe chuan mellung duhawm a phun, kum 24 mi chauh ni chungin tunah chuan Paris Saint Germain tana goal khung hnem ber a ni ta - Paris club tan hian goal 201 khungin Edinson Cavani nen record inṭawm an chelh chu a kalsan.

Ligue 1 champion lai hian Inrinni zan khan an mikhual Nantes chu 4-2 in an hneh. Paris club tan Lionel Messi-a'n goal khung bul a ṭan a, a hnuah defender Jaouen Hadjam chuan anmahni lamah a ti lut.

Danilo Pereira leh Mbappe ten an khung belh a, mikhual tana Ludovic Blas leh Ignatius Ganago te goal khungin awmzia a nei phak lo. Christophe Galtier-a naute hian match khata khel tamin Marseille lakah point 11 zetin hma an hruai fal ta.

France international Mbappe hian 2017 khan AS Monaco aṭangin Paris St-Germain hi a zawm. Ligue 1 nomawi chauh pawh vawi li a chawi pui tawh a, a kum a la tam loh avangin PSG tan a khel reng a nih chuan a sulhnu hi midang tan khum a harsa ang.

Mbappe chuan, "Hun tawp dawn thlengin ka tana remchan thlen hun ka nghak a, a tawpah chuan ka nghak chhuak. Paris khawpuiah hian kum ruk chhung ka cheng tawh, he hmun ka thlen aṭang khan lawmna hrang hrang ka tawng hnem ta hle.

"Tawnhriat pawh ka nei tam ve tawh a, chutih rualin tun ṭum ka goal chu a hlu dangdai bik hlein ka hria. A pawimawh ber erawh team hian eng ang hlawhtlinna nge kan chan tih a ni zawk," a ti.

Mbappe hi Real Madrid nen nasa taka sawi zawm a ni ṭhin. Mimal chawimawina sang dawng tur chuan Champions League nomawi a mamawh tih chu a chiang, chumi tur chuan Spanish club a zawm mai ang em tih chu zawhna awm reng a ni.

PSG hian Nilaini zanah UCL last 16 second leg khel turin Bayern Munich an lenchilh dawn, anmahni khelmualah 1-0 a an ngam loh an nih avangin PSG tan thapui thawh a ngai dawn - an chak lo a nih chuan nghawng na tak a nei ang.

A hma hun zawhna chhangin Mbappe chuan, "Paris khawpuiah hian ka hlim tawk, tun dinhmunah chuan thil dang ngaihtuah ka nei lo," a ti a, mimal chawimawina sang Ballon d'Or erawh a suangtuah ṭhin tih a sawi bawk.