A chung berah Bayern Munich

Bayern Munich chuan VfB Stuttgart 2-1 in an luhchhuah a, tun hma lama nghet taka an awmna ṭhin Bundesliga table chung berah awmhmun an khuar leh ta - Julian Nagelsmann enkawl Bavarians awmhmun rem hi nghet tak erawh a la ni bik lo.

German champion lai tan hian defender Matthjis de Ligt leh Eric Maxim Choupo-Moting ten goal khat ve ve an khung. Contract ziak thar hlim Choupo-Moting hian Jamal Musiala leh Thomas Muller te thawhrah sengin an goal hnihna hi a khung.

Zirtawpni zan khan Borussia Dortmund chuan RB Leipzig 2-1 a hnehin table chung ber dinhmun an luah a, mahse Inrinni zana Bayern chak hian point hmuh hnemah an nihrual, goal difference nei ṭha zawkin a chungah hian an awm.

Bayern hian kum dang angin season an hmang ṭha tawk lo, hnehsawh taka an awpbeh ṭhin Bundesliga title pawh club dangin na takin an chuhpui ngam mek. Champions League lamah erawh quarterfinal lut turin an dinhmun an siamṭha rih viau.

Nilaini zan hian UCL last 16 second leg khel turin Paris Saint Germain an lo mikhual dawn. Allianz Arena-ah inkhel hmuhnawm chhawpchhuah a ni ang.