Medvedev dang thei an awm lo

Dubai Tennis Championship chu Inrinni zan khan a hmawr bawk a ni a, world number 1 hlui Daniil Medvedev chuan champion lai Andrey Rublev hnehin a champion - tun hnaiah Medvedev a khel ṭha thei rem rem hle.

Kum 27 mi Medvedev hian amah ang bawka Russian player Rublev hi 6-2, 6-2 in a hneh. Tun hnaiah Doha leh Rotterdam Open-ah a champion bawk, tournament a khelh hnuhnung pathumah a champion vek tihna a ni.

Medvedev chuan, "Tunlai ka khelh dan chu keimah ngei pawhin mak ka ti, a chhan chu season bul kha duhthusama ṭhain ka ṭan bik lo. Tennis huangah chuan kan champion lo a nih chuan inbuatsaih dan thiam pawh a harsa ṭhin.

"Kan champion a nih erawh chuan inrintawkna kan nei hnem tial tial a, thil hi a awlsam phah mai ṭhi. A zawna tournament vawi thuma champion hi chu ka hriatreng tawh tur thil a ni," a ti.

Final kalkawngah Medvedev hian world number 1 Novak Djokovic pawh a hneh. Australian Open champion Novak hi kumina a chak loh vawi khatna a ni thung, player ṭha pahnih hi an inel chhunzawm zel dawn niin a lang.