Chelsea mualah Borussia Dortmund

"Goal kan khung, Goal kan khung..." tiin Stamford Bridge chhunga inkhel entute an au rual dual dual a, zaninah pawh Blues ṭantute hian goal lawma au rual leh ngei an duh ang. Zanin dar 1:30 hian London club-in Borussia Dortmund an lo mikhual dawn.

Champions League last 16 first leg an khelh ṭum khan, mualneitu Dortmund lamin Karim Adeyemi-a goal khat hmangin hnehna an chang - Bundesliga club tan quarterfinal lut turin zaninah goal venhim a tawk.

Graham Potter-a naute tan erawh tlang tur chuan goal khung ngei ngei a ngai dawn, tunlaia goal khung harsat tak mai Chelsea hian engtin nge Dortmund tlarhnung sut hawn an tum ang tih chu hriat a châkawm tawh hle.

Inkhel dangah Benfica chuan Club Brugge an lo mikhual dawn. Portuguese club hian khualmualah 2-0 in hnehna an lo chang tawh, zanina an inkhelnna tur hi Estadio da Luz a nih avangin harsa vak loin an tlang mai a rinawm.

Goal a ngai

January 15 hnuah Chelsea hian anmahni khelmual Stamford Bridge-ah ngei mai goal khat chiah an la khung! Kar tawp Premier League inkhelah Wesley Fofana goal khat hmangin Leeds United 1-0 in an hneh a nih kha.

Blues ṭantute "Goal kan khung, Goal kan khung..." tia an au rual pawh kha a mak hran lo - thil thleng khat tak a ni tlat. Leeds an hneh hnuah Potter chuan, "Hnehna kan chan hian UCL atan phurna nasak tak min siam ngei ang," a ti.

Dortmund khelmualah khan Mykhailo Mudryk, Joao Felix, Hakim Ziyech leh Kai Havertz te chu goal nawr tura thlan an ni a, ball chang tam zawk ni mahse a pawimawh ber goal an khung thei tlat lo, zainah chuan an insiksawi a rinawm.

Tun hnaiah Raheem Sterling a rawn khel ṭha leh ṭan a, zaninah pawh bul a ṭan ngei a rinawm. Potter chuan, "Sterling-a theihna hi chu inzawh nawn a ngai lo, he hmunah hian naumti takin football a khel mek bawk, match hnuhnung pahniha a ṭangkai zia pawh kan hmu.

"Malpui hliam vangin a chawl reng a, tunah chuan a inpeih leh tawh. European football huanga a goal khung leh chet dan avang hian amahah rinhlelh tur a awm lo," tiin Sterling chu inkhel bul ṭan tur zingah a tel dawn tih a sawi.

England international Sterling hian European football inelna sang berah hian match 92 a khelh aṭangin goal 26 a khung a, assist ṭum 24 a nei bawk - a sulhnu en chuan Chelsea player zingah Dortmund tana harsatna siam thei ber tur niin a lang.

Tlarhnung lam

Chelsea tlarhnunga an hotupa ber chu Thiago Silva a ni a, a theihna san bakah a tawnhriat ṭha chu player dang tan a ṭangkai ṭhin. Mahse, Silva hi tun dinhmunah chuan hliam vangin a chawl mek - zaninah pawh a inlan thei dawn lo.

Silva hmunruak hi hnawh khah a harsa dawn, chutih rualin - Kalidou Koulibaly, Wesley Fofana leh Benoit Badiashile te an la nei a, tlarhnung laia khel tur chu an haihchham lo, an ṭha tawk em tih erawh fiah a ni dawn.

Mual sira khel thiam Ben Chilwell a dam ṭha tawh - English defender hi Leeds United lakah pawh ṭha takin a khel thei. Reece James erawh a dinhmun a chiang lo, a khel thei lo a nih chuan Ruben Loftus-Cheek chu pawh hnun a ngai mai thei - Cesar Azpilicueta chhawr theih a ni si lo.

Chelsea tlarhnung hi duhthusama nghet ṭha an ni lo tih chu phat tur a awm lo, chutih rualin Dortmund hi an tlarhma a hriam tawk bik lo. Beiseina sang tak nena an lakluh Sebastian Haller tan fiahna hautak a ni thei tura ngaih a ni.

Erling Haaland thlak nana an lak Haller hi cancer vangin a buai a, mahse a dam tawh. Ajax striker hlui hi Blues nen an intawn hmasak pawh khan a inlan, mahse hliam dankawr a la nih avangin tuna a boruak nen chuan khaikhin chi a ni lo ang.

Edin Terzic-a naute hi Bundesliga lamah chuan Bayern Munich elphak an ni mek, an point hmuh zat a inang. Thawm na tak ni rih lo mah se hei hian team ṭha an ni tih a nemnghet a, team talbuai lai Chelsea tan awlsam taka paltlang tum chi a ni dawn lo.