Novak Djokovic a inhnukdawk

United States lut turin Novak Djokovic tan harsatna a la awm, hripui leng laka invenna vaccine a lak duh miau loh avangin atan US ram pan ngawt theih a la ni lo - Indian Wells aṭang pawhin a inhnuhdawh leh a ngai ta a ni.

Serbian star hian thla hmasa khan US sorkar hnenah Indian Wells leh Miami Open khel turin dilna a thehlut, tournament buatsaihna lam chuan remti thlap mah se sorkar thuneitu lamin an rama zin lut turin phalna a la pe lo.

Indian Wells buatsaihtu lam chuan thuchhuah siamin, "Novak Djokovic chu 2023 BNP Paribas Open aṭangin a inhnukdawk, a hmunruakah Nikoloz Basilashvili a awm thung ang," an ti.

US sorkar inkaih-hruaina danah vaccine la lo tan an ramah zin luh theih a ni lo, inkaihhruaina an hman lai hi May 1 thleng awh tura tih a ni. Inkaihhruaina tharah chuan an thlahdul a rinawm, mahse chumi hma chuan mi hmingṭha bik tan pawh dan an neih lai tih danglam an tum lo.

Djokovic hian tuna a buaina vang hian season hmasa pawh khan Indian Wells leh Miami Open bakah US Open pawh a khel thei lo. Inelna lian US Open chu September thlaa khelh tur a ni a, dan thar an hman chuan New York khawpui a pan theih tawh a rinawm.