Mizoram Football Association hmachhawp

Mizoram Football Association chuan kum 2023 hian Golden Jubilee a lawm dawn a, hemi denchhen hian ruahmanna hrang hrang a siam. MFA leh Royal Netherlands Football Association (KNVB) ṭangkawp chuan April-ah hian World Coaches programme a buatsaih dawn a, Netherlands legend Johan Neeskens a lo kal dawn.

Heng bakah hian MFA-in Golden Jubilee pualin ruahmanna hrang hrang a siam a, chungte chu a hnuaia tarlante hi a ni.

Exhibition match

Indian Navy leh MFA chuan exhibition football match an buatsaih dawn a, MFA Golden Jubilee lawmna kawng khat anga kalpui a ni ang. He inkhelh hi March 31, 2023 hian Kolasib-ah nghah a ni dawn.

Indin Navy football team ṭha an rawn kal dawn a, Mizoram football team hi Kolasib District Football Association lamin an kaihruai thung dawn a, KDFA hian he inkhel hi an thleng ang.

MFA Women's League

MFA Women's League chu April, 2023 hian Aizawla khelh tura ruahman a ni a, thil ṭulte buaipui mek a ni. Mizoramah hmeichhe football club nghet a la awm meuh loh avangin a kalphung tur kimchang hi ngaihtuah chhoh mek a ni.

Hmeichhe football club dina MFA Women's League-a khelh duh - veng, khua, educational institution, GSA etc an awm chuan MFA Women's League secretary R. Lalramzauva - biak pawh theih a ni.

MFA Cup leh Inter District Junior Boys Football:

MFA Cup 2023 chu Khawzawl District Football Association-in an thleng dawn a, April-ah khelh a ni ang a, DFA tinin club pakhat an tir thei ang.

Inter District Junior Boys Football Championship chu March 28 - April 5, 2023 chhung hian Kolasib District Footbaall Association-in a thleng thung ang.

Inelna dang

MFA chuan Reliance Young Champs nen ṭang kawpin naupangte football inelna Naupang League a kalpui mek a, kum 13 hnuai lam tan Aizawl leh Champhai-ah age group pangaah league kalpui mek a ni a; Lunglei leh Kolasib lamah a kalphung danglam hretin kalpui mek a ni bawk.

MFA Under 15 League khel turin inbuatsaihna a kal mek a, club pasarih an tel ang. MPL Under 18 pawh khelh mek niin MPL club pariatte chu vawi hnih ṭheuh an inkhel kual chhuak dawn.

Reliance Foundation nen ṭangkawpin Reliance Foundation Development League kalpui a ni dawn a, a khel tur club paruk thlan fel tawh a ni. Anni hi vawi hnih ṭheuh an inkhel kual chhuak ang a, a tiṭhate chu ram pum huap inelnaah an kaisang ang.