Barca-in champion an hnaih zel

La Liga-ah hmahruaitu Barcelona-in Pathianni zan khan Valencia 1-0 in an hneh a, inkhel dangah Real Betis-in champion lai Real Madrid an chelh. Catalan club hian match 24 aṭangin point 62 a hmu a, an hmelma Los Blancos aiin khelh zat inangah point kuain an sang zawk.

Barca tan Raphinha

Europe inelnaah Xavi kaihruai Barcelona an che ṭha lo a, Champions League aṭanga an tlak hnuah Manchester United an ngam loh avangin Europa League aṭangin an tla. La Liga-ah erawh Catalan club an che ṭha zel.

Pathianni zan Nou Camp-a inkhelah Sergio Busquets-a ball vawrhluh chu Raphinha-a'n minute 16-na lekah a tauh goal. Barca hian second half-ah penalty an hmu a, Ferran Torres-a'n a club hlui lamah a khung thei lo - goal ban a pet per.

Lionel Messi jersey kalsan no. 10 hatu Ansu Fati pawhin woodwork a tih per a, Barca hian an chance ṭha neih hi khung se nuam sa zawka chak thei tur an ni. Amaherawhchu Catalan club-in an khung belh thei lo a, Ronald Araujo chu minute 59-naah hnawhchhuah a ni bawk.

Jules Kounde ball tauh ṭhat tawk loh chu Hugo Duro tan chance ṭha a nih theih avangin Barca defender Araujo-a'n a foul a, red card hi pek a ni. Player 10-a khel chungin Barca 1-0 in an chak a; Robert Lewandowski, Ousmane Dembele leh Pedri te an khelh theih loh bakah hrem vangin Xavi-a'n technical area-a a awmpui theih loh avangin result ṭha a ni.

Real an chelh

Real Madrid-in Europa League-a Manchester United khingpui tur Real Betis an tlawh a, goal an khung theih loh avangin point hnih an hloh. Los Blancos an vanduai a, Karim Benzema freekick chu VAR hmanga ennawn a nih hnuah Antonio Rudiger kut a fuh avangin pawmsak a ni lo.

Second half-ah team pahnihin chance an ngah a, Betis keeper Claudio Bravo-a'n vawi nga ngawt an dang a, Benzema leh Vinicius Jr. ten Barca keeper hlui an paltlang thei lo. Thibaut Courtois pawhin Juan Miranda leh Leicester City aṭanga loan hmanga an hawh Ayoze Perez te goal khung tur a dang bawk.