Formula 1 season thar an tlan ṭan ta ; Red Bull driver pahnih kiangah Alonso

Max Verstappen-a'n champion lai a nihna a takin a lantir a, a teammate Sergio Perez pawhin title chuh phak a nihna a lantir nghal bawk - vanglai pel tawh Fernando Alonso-a'n podium a lawn phak dan chuan sawi zui a hlawh hle bawk.

Car intlansiakna sang leh ngaihhlut hlawh ber chu Pathianni zan khan tun season atan tlan ṭan a ni. Bahrain Grand Prix-ah hian Red Bull driver ten ro an rel a, hmasawn beisei Mercedes driver Lewis Hamilton chu pangana a ni thung.

Red Bull chu

Mercedes leh Ferrari te ṭhat zia inhrilh nawn a ngai lo - team hlun bik an ni. Mahse, ṭhangtharte chuan Red Bull chanchin hi an hre reng tawh dawn, car intlansiakna sangah ropui takin an leng vel mek a ni.

Nikum July thla aṭanga chhiar chuan, intlansiak 12 awm zinga 10 teh meuhah Red Bull hian hnehna an chang. Bahrain bikah phei chuan Verstappen hi rinkai ber a ni bik lo, mahse amah aia tlan chak reng an awm lo.

Dutch tlangval hian a hmasa ber aṭangin intlansiak a hmachhawn a, season hmasa ang bawkin a chungnung leh dawn niin a lang - pahnihna Perez nen an inkarah second 11.9 a awm - Max tan F1 huanga vawi 36 a chak tlinna a ni nghal bawk.

World champion vawi hnih ni tawh Verstappen chuan, "Kan team tan chuan intlansiak nuam leh hlimawm tak a ni. Duhthusam ang thlapa ṭhain season bul kan ṭan niah ka ngai, pakhatna leh pahnihna nih aia ṭha a awm thei lo," a ti.

Champion tur?

Intlansiak pakhat chauh an la hmachhawn a, qualifying leh intlansiak pangngai an tlan dan aṭanga tehin Mercedes driver George Russell chuan Red Bull chuan champion turah a ngai, a rilru tak tak a sawi em tih hriat a ni lo.

Russell chuan, "An chet dan ka en chuan intlansiak zawng zawngah hnehna an chan theih mai ka ring. Harsa vak loin an chak thei mai a, an enkim mai kha a fuhin a dik em em a ni tih zep tur a awm lo, mitin kan hmu vek.

"A hmasa ber aṭangin an tlan chhuak reng bik lo a ni mai thei, mahse car an nei chakin thawhhona a ṭha bawk. A nihna tak sawi chuan, engtiangin nge anmahni hnaih thei ang bera kan awm ang tih kan ngaihtuah a ngai," tiin an elpui team a dahsang hle.

Britain tlangval George Russell hi pasarihnaah a thleng a, a teammate Lewis Hamilton chu driver ṭha tak ni mah se champion nomawi chawi turin a beisei ngam chiah lo niin a lang - Red Bull chhaih buai a tumna lek pawh a ni ve thei bawk.

Beisei phak bak

Red Bull driver pahnih kianga Fernando Alonso ding thei hian khawvel mak tih a hlawh, a theihna san zia chu hriat ni mah se kum 41 mi a ni tawh a, team ṭha zinga mi ni lem lo Aston Martin car khalhtu a nih vanga mak tih hlawh zual a ni.

Pasarihna aṭanga pathumna dinhmun luah tur hian driver ṭha dang a tlanpel. Sakhir tlankawngah khan Alonso chauh ni loin Aston Martin team khan khawvel an brakhaih tel, car tlan chak ber pahnihna dinhmun an luah phak hial.

Spanish driver Alonso chuan, "A nihna tak sawi chuan kumin chu hmasawn kumah kan ngai a, nikum aiin car chak leh team ṭha zawk neih chu kan tum ngei mai, podium lawn nghal erawh kan beisei phak baka sang a ni thung.

"Bahrain Grand Prix-ah Red Bull chauh kan umphak lo a ni a, kan tan chuan kartawp hlimawm leh chhinchhiah tlak tak a ni, a mak angreng hle," a ti. Alonso hian F1 intlansiak hi vawi 365 a hmachhawn tawh a, kum 2005 leh 2006 khan a lo champion tawh.

Beisei phak lo

Ferrari hian beisei an phak thei lo, season hmasa khan bul ṭan fuh mah se an zuih ral - kuminah chuan a tir aṭangin an che fuh lo nghal. An driver ṭha zawk Charles Leclerc chuan pathumna dinhmun te luah zak zak mah se engine chiang lo vangin a tlan zo ve thei lo.

Leclerc aia che ṭha zawk Carlos Sainz pawh palina dinhmun luahtu a ni phak chauh. Tun hnai season riat chhung vel kan thlir kir a nih chuan, tun hma lama driver tam zawkin 'car sen' khalh an chak ang kha an ni thei rih lo a ni.

A vawi riat nana world champion nih tum Hamilton pawh pangana chauh a ni phak. Mercedes driver hian champion hnem ber nih kawngah Michael Schumacher kalsan tum mah se a kawng a harsa dawn tih a chiang - Red Bull an ngam rih tlat lo.

Season hmasa khan Hmailton hian chak ni hmel a hmu miah lo - F1 a luhchilh china season tluana a chak loh vawi khatna a ni hial. Kuminah hian champion a tum dawn, chumi tur chuan March 19, Pathiannia tlan tur Saudi Arabian Grand Prix aṭanga insiamṭhat a ngai ang.