Roma lakah Juventus an tlawm
Pathianni zan Serie A inkhelah AS Roma chuan Juventus 1-0 in an hneh, goal awmchhun hi Gianluca Mancini-a'n minute 53-naa a khung a ni a, mualneitu Roma tan point thum hmuh nan a tawk.
Roma hi an manager Jose Mourinho chu hrem tur a ni a, mahse a khin let avangin a hremna hi an kalpui rih lo - a naute a kaihruai thei. Team talbuai Cremonese laka tlawm hlim an nih avang erawh chuan anmahni khelmualah ngei mualpho nawn pawh a hlauhawm hle.
Mahse, Angel di Maria leh Dusan Vlahovic te awmna team an dangchat thei a, bench aṭanga Paul Pogba rawn lut pawhin Old Lady tan goal a rawn keng tel lo - hun tawp dawna luhtir Moise Kean chu khelmual a luh aṭanga second 40 lekah hnawh chhuah a la ni zui.
Roma manager Mourinho chuan, "Roma kan chak chhan chu team ṭha zawk kan ni a, player ten 100% a rilru an pek vang a ni bawk. Manager in player a remkhawm dan vanga chak kan ni lo, player rilru put hmang vang zawk a ni.
"Massimiliano Allegri leh a naute ka zah khawp mai, an khel ṭhain hlauhawm tam tak min siamsak. Mahse, kan inveng thei a, kan keeper Rui Patricio khan thil mak a ti zeuh zeuh bawk," tiin an naute khelh danah a lungawi hle.
Old Lady manager Allegri chuan, "Roma hi team ṭha leh beidawng ve ngai lo an ni tih kan hria. Goal kan chhuah hnuah khan khung ve theih nan minute kan la ngah tawk, mahse a hmawr kan bawk thei tlat lo kha a pawi," a ti.
Sum hman leh lakluh chungchangah Juve hian dan an bawhchhia a, point an hmuhsa aṭangin 15 paihsak an ni - an tan champion beisei ngamna a tawp tawh a, season thara Champions League khel phak tur pawhin midang chetsual an chan tel a ngai ang.
Inkhel dangah Inter Milan chuan Henrikh Mkhitaryan leh Lautaro Martinez te goal hmangin Lecce chu 2-0 in an hneh a, match 25 aṭanga point 50 hmuin table-ah pahnihna dinhmun an luah ve leh ta.
Serie A hmahruaitu Napoli chuan point 65 an hmu tawh thung, pahnihna Inter nen an inkarah point 15 tehmeuh a awm tihna a ni. Match khelh hmabak hi 13 lai la nei mah se kumin Serie A nomawi chu Naples khawpuiah a lut ngei dawn niin a lang.
