Point khatah Sean Dyche a lawm

Premier League table mawngphah lama talbuai mai Everton manager Sean Dyche chuan, vawi hnih ngawt an hmahruaina humhim thei lo mah se an tan point khat chu thil lawmawm a ni tih a sawi chhuak.

Pathianni zan inkhelah Everton hian Demarai Gray leh Abdoulaye Doucoure te hmangin ṭum hnih hma an hruai. Mahse, mualneitu Nottingham Forest lamin Johnson hmangin an sut ve ve a ni.

Dyche chuan, "Point kan hmuh avangin ka lawm. He club ka rawn zawm aṭang khan player-te inpekna a sang tial tial niin ka hria, hnehna chang thei dinhmuna kan din hnuah kan chesual leh tih chu ka hria, mahse point khat hi thil lawmawm a tling," a ti.

Everton hian match 25 aṭangin point 22 an nei a, tla thei chinah chian an la awm - an chunga awm Leeds United nen an point hmuh a inzat a, goal difference an neih ṭhat loh zawk vangin an hniam zawk.

Kar tawp inkhelah Bourne-mouth, West Ham leh Leeds te an chak lo vek a, an elpui chetsual hunah Everton hi chak ni se la chuan 16-naah an invawrh chho thei ang, mahse Toffees tan awlsam taka point thum hmuh ngawt theih a ni bik lo.

Forest hi 15-naah an la awm thung a, season tharah EPL khelh zel an la tum ruh hle. Coach Steve Cooper chuan, "Match official lamin thutlukna an siam fuh tawk lo deuh niin ka hria, kan goal hnihna chhuah danah khan Everton lam khan an foul ni ngeiah ka ngai.

"Everton ang bawkin keini pawhin hnehna chan kan duh, mahse official lamin kan chak an remti lo," a ti. Goal hnihna an chhuah hmain Gibbs-White lakah Toffees lam an foul ngei niah a ngai.