Durant hoin Phoenix Suns an chak

Kevin Durant-a'n nimin zing khan player ṭha bik a nihna a lantir a, point 37 zet neiin Phoenix Suns chu player ṭha Luka Doncic awmna Dallas Mavericks lakah 130-126 in hnehna a chanpui.

Team pahnih hi NBA Western Conference lama inel lai an ni a, champion tura rinkai pawh an ni phak. Phoenix hian bul ṭan fuh zawk mah se chawlhlawk an hman meuh chuan Dallas hian point an hmu hnem zawk.

An inkhel tawkin chak zawk tur pawh rinthiam a harsa, hun tawp dawn second 12 pawh awm tlin tawh lohah Durant-a'n basket a rawn nei a, a hnuah free throw vawm lut zui lehin a team a chakpui.

Durant hi Devin Booker chuan a thlawp ṭha hle. Booker hian point 36 a neih vakah assist avawi 10 a nei bawk a, point 11 neitu Chris Paul leh Ish Wainright (12) te chu an chakna hnar zinga mi an ni bawk.

Mavericks hian Kyrie Irving an neih hnuah besei an nei sang zual a, ani hian point 30 a nei. Luka Doncic pawhin point 34 a nei leh bawk, mahse team ṭha Suns laka hnehna chan nan chuan an thil tih hi a tawk zo lo.