Anfield-ah Ten Hag-a hoten GOAL an hak
Liverpool-in season ṭantirh lamah beisei pha lo mah se Pathianni zana Manchester United an mikhual ṭumah erawh mark 100-ah 100 an hmu a, an khawih apiang rangkachakah a chang ta emaw tih mai tur a ni.
Anfield-a inkhelah hian Cody Gakpo, Darwin Nunez leh Mohamed Salah ten goal hnih ṭheuh an khung a, Roberto Firmino-a'n goal khat a khung bawk. Liverpool-in an hmelma Man United an sawp ber ṭum a ni a, Erik Ten Hag-a hoten goal khung tumin nawr ve bawk mah se goal hakin an mualpho.
Salah record
Season liam ta khan Liverpool-in Man United hi 4-0 in Anfield-ah an sawp tawh a, khami ṭum khan Salah-a'n goal hnih a khung.
Tun ṭumah pawh Salah hian goal hnih tho a nei a, assist vawi hnih a nei bawk. Eygptian forward hian Reds tan Premier League bikah match 205 a khel a, Man United lakah goal 128 leh 129-na khungin EPL bika Reds record Robbie Fowler (128 goals) a siam chu a khum.
Inkhelh banah a lawm dan tur chungchang an zawt a, Salah chuan, "Ka chhungte nen ka lawm ang a, 'camomile' thingpui ka in zawhah tui takin ka mu ang," tiin a chhang.
Reds boss Klopp pawhin, "Goal 129 chu ṭhahnem tak a ni a, player danglam bik a nihzia a pholang. Tunah pawh a hnathawh avangin kan lawm a, nakinah chuan a hnathawh hi an la thlir let ang a, mak an la ti ngei ang," tiin a fak hle.
Ni e, Salah hian fak a phu. Man United defender-ten a thiamzia an hrechiang lehzual ang. A bik takin Argentine defender Lisandro Martinez-a'n Salah dan harsatzia a sawifiah thiam ber ang.
Nunez leh Gakpo
Liverpool-in nipui bazarah Darwin Nunez an lalut a, Uruguayan forward hi a chesual a lansarh ṭhin avangin fiamthu thawh nan an hmang hial. Thlasik bazarah PSV leh Netherlands tana che ṭha Gakpo an lalut leh a, Dutch forward hian beisei a pha lo bawk.
Mahse, Nunez leh Gakpo ten 'talent' an nei tih chu Anfield-ah a chiang. Gakpo-a'n a chance ṭha neih hmasak ber a khung a, goal hnihna pawh class tak a ni. Chutiang bawkin Nunez-a'n a lu hmangin goal hnih a khung a, Man United chak beiseina a titawp hmak. Anfield-a thil thleng avangin player pahnih an thlir dan a danglam tawh ang.
Reds ṭantuten Man United nghaisak hi nuam an ti a, Salah leh Firmino ten an khingpuite hliama chi al an han phul leh sak phei chuan lawmna vawrtawp a thlentir hial ang. Chutihrualin Man United ṭantute tawrhna erawh thua sawifiah theih a ni lo a, an chak loh dan hi Reds ṭantuten hlain an siam ang a, kum tinin an na thar leh ṭhin ang.
Kan chak loh dan hi pawm dam theih a ni lo
- Ten Hag
Erik Ten Hag-a'n Manchester United hi season khat pawh la enkawl tling lo mah se hun chi hrang hrang an tawng hnem tawh hle. Man United hi Brentford lakah 4-0 in an tlawm tawh a, Manchester City lakah 6-3 in an mualpho leh a, hemi zawh hian La Liga hmahruaitu Barcelona an hneh bakah League Cup nomawi an chawi.
Man United-in League Cup nomawi bakah Premier League, Europa League leh FA Cup an la beisei thei a, mah se tunah erawh an thil thlir dan a dang tawh ang. Ten Hag-a hote hi Liverpool lakah an zawr a, 7-0 ngawta an tlawm avangin league nomawi beisei ngam chi an ni tawh lo.
Ten Hag chuan, "Inkhelah chuan a chak loh theih a, mahse hetiang tur hi a ni lo. Hetiang hi a thleng nawn tur a ni lo a, kan sawi zui a ngai. Kar liam ta te, thla liam tate kha chuan chak duhna thinlung ka hmu. Tun ṭumah erawh kan thil tum kan theihnghilh a, kan talbuai a, kan hna kan ti lo. Ball chan tumin kan tlan let lo a, kan professional lo hle a ni," tiin a thinur thu a sawi.
Dutch manager chuan sawi chhunzawmin, "Brentford leh Man City laka kan mualpho ṭumin kan tho leh. Tun ṭuma an chak loh avangin kan fan-te kan ti hnual a, ka thinur takzet a ni. Fan-te inkhelh laia stadium an chhuahsan kha ka dem lo a, ka thiam loh a ni. Hma chu kan sawn ngei a, mahse kan ngelnghet lo. Chutihrualin match khat chauh a ni," tiin a sawi.
Man United hi Anfield-ah an mualpho a, chutihrualin Bruno Fernandes leh Marcus Rashford te hmangin goal chance ṭha an nei hmasa. Bruno leh Rashy te hian khung se inkhel result a danglam ngei ang. Ten Hag-a hote tan nomawi ni loin UCL khel tura dinhmun tihngheh a pawimawh a, Reds pawh UCL khel thei turin an ṭha tawk tih an rawn pholang bawk.
