Zaninah ISL Semifinal - 1st leg ; Lianzuala leh Apuia te khingpui tur Chhetri 'Bengaluru'

Indian Super League semifinal chu zanin aṭangin khelh ṭan a ni dawn a, Mumbai Football Arena-ah league round-a pakhatna Mumbai City-in zanin dar 7:30 hian Bengaluru FC an mikhual dawn.

ISL semifinal hi double leg-a khelh tur a ni a, Lallianzuala Chhangte leh Lalengmawia Ralte (Apuia) te khelhna Mumbai hian Bengaluru an tlawh leh ang. Semifinal pakhat zawkah ATK Mohun Bagan leh Hyderabad te an inkhel bawk ang.

Mumbai hi league round-a pakhatna ni mah se semifinal-ah an point hmuh hi

an keng tel lo a, an dinhmun a ṭha bik lo. Bengaluru erawh semifinal khel turin 'knockout'-ah Kerala Blasters an hneh a, an hneh dan pawhin sawizui a hlawh.

India captain Sunil Chhetri chuan an khingpuite inrin hmain freekick a pet goal a, Kerala Blasters player-te an chhuah tau avangin inkhelh a tawp zui. Chhetri-a'n tawnhriat a nei ṭha a, semifinal boruak sangah a rilru paukhauhna hi team tan a ṭangkai ang.

Bengaluru hian tun season-a Mumbai City an hmachhawn hmasak ṭumin 4-0 ngawtin an ngam lo. Mahse, February 15-a an inkhelh ṭumah erawh 2-1 in an hneh thung. Simon Grayson-a hote tan hian Chhetri leh Javi Hernandez ten an khung a, hei hian inrintawkna nasa tak an neih phah ang.

Mahse, Mumbai City-in Bengaluru 2-1 a an hneh loh ṭum hian Des Buckingham hote hi pakhatnaah a awm chiang tawh. Hei chauh hi a ni lo, zanina an inkhelhna tur Mumbai Football Arena-ah hian Bengaluru hi 4-0 ngawtin an lo sawp tawh bawk.

Mizo tlangval Lianzuala Chhangte-in season ṭha tak a hmang a, match 20 inlanin goal 10 a khung bakah assist vawi ruk a nei. Lunglei tlangval hi Mumbai City goal nawrna ber a ni a, Mizote tan ISL semifinal a hmuhnawm phah dawn.

Lianzuala bakah hian Lalengmawia Ralte-in (Apuia) midfield-ah hmun pawimawh a chang pha. Mumbai hian Argentine forward Jorge Pereyra Díaz an kawl a, ani hian match 18 aṭangin goal 11 a khung - Bengaluru tan ven uluk a ṭul dawn a ni.