Bayern mikhual tur Messi leh Mbappe 'PSG'

Champions League last 16 second leg-ah Bayern Munich-in zanin dar 1:30 hian Allianz Arena-ah Paris Saint-Germain an mikhual dawn. Bavarians hian Paris-ah 1-0 in hnehna an chang a, Julian Nagelsmann hote hi an dinhmun ṭha hret mah se an khingpui tur hi Lionel Messi leh Kylian Mbappe telna PSG a ni tlat.

PSG coach Christophe Galtier chuan March 3, Zirtawpni khan Neymar a tel theih loh tur thu a sawi chiang a, Bavarians ṭantute tan thu hriat nuam a ni ngei ang. Mahse, Neymar tel lo hian PSG-in Marseille 3-0 in an sawp a, Nantes 4-2 in an hneh leh bawk.

Mbappe a dam ṭha

Bayern-in Paris-ah hna ṭha tak an thawk a, mahse an khingpui PSG-in hliam damkawr Kylian Mbappe bul an ṭantir lo. Mbappe luh hnuah inkhel a danglam a, German club an talbuai hle.

Bavarians tan Mbappe ringawt hi ven tham a tling a, chutihrualin PSG-in Messi an la nei bawk. First leg-ah Argentine forward Messi vangin Benjamin Pavard chu hnawhchhuah ni a, Bayern-in player 10-in an khel tluan.

Bayern manager Julian Nagelsmann chuan, "An tlan chakna aṭanga teh chuan chemte a tin ang reng kan ni," tiin PSG goal bawh natzia a sawi a, second leg-ah Mbappe ṭha zawka kan ven a ṭul dawn.

Mbappe hi kum 24 mi chauh a la ni a, chutichung chua

n PSG tana goal khung tam ber niin goal 201 a khung tling der tawh. French forward hnuaiah hian Edinson Cavani (200 goals) leh Zlatan Ibrahimovic (156) te an awm a, hei hian a ropuizia a sawifiah.

Bayern laka an tlawm hnuah PSG hian goal thum an la khung tling ziah a, Mbappe hian an match hnuhnung pathumah goal nga a khung. Neymar awm lo tur hi PSG tan chânna ni thei mah se Mbappe leh Messi ten ball tam zawk an chan theihna a nih chuan hlawkna a ni zawk thei tlat.

Messi a ropui, mahse...

Lionel Messi hi uain ṭha mi ngei chu a ni a, a upa tulh tulh a, a ṭha tulh tulh. Argentine forward hian a naupan laiin FIFA World Cup nomawi a chawi thei lo a, kum 35 mi a nih meuh chuan Diego Maradona hnungzuiin World Cup nomawi a chawi ta.

PSG star hian World Cup-ah khan Golden Ball a dawng a, Silver Boot a dawng a, Qatar-a a chet ṭhat zarah Best FIFA Men's Player-ah an thlang zui. Messi hian team leh mimal anga chawimawina awm thei ang zawng zawng chu a hui vek a tih theih.

Mahse, khawvel a nih miau avangin player ropui ber zinga mi Messi pawh hi a famkim bik lo. Messi hian Barcelona tan UCL nomawi vawi li chawi mah se PSG erawh an duh ber UCL nomawi a chawipui thei rih lo.

Messi elpui ber Cristiano Ronaldo-a'n phun sawn a dawl viau laiin Argentine forward erawh Xavi leh Andres Iniesta puihna dawng lo chuan UCL nomawi a dawng dawn lo niin a lang. Chutihrualin Messi hian Barca ni lo, club dang UCL nomawi chawipui turin hun a la nei a, hun erawh a ngah tawh lo. Zanin hi Messi tan hun ṭha a ni a, Paris club champion turin Bayern an hneh phawt a ṭul dawn a ni.

Bayern leh Mane

Bayern Munich-in second leg-ah Sadio Mane an chhawr thei tawh dawn a, hei hian German club phurna nasa tak a pe ang. Bavarians hian Bundesliga-ah an elpui Union Berlin 3-0 in an sawp a, match hnuhnung berah Stuttgart 2-1 in an hneh bawk.

Nagelsmann-a'n PSG a ngai pawimawh tih a lang a, Benjamin Pavard a chhawr theih dawn loh avangin match hnuhnung pahnihah hian right back-ah Josip Stanisic a chhawr ve ve.

Bayern hian PSG lakah 1-0 in hma hruai mah se goal venhim tawp erawh a him dawn lo. Hei vang hian Nagelsmann-a'n a naute a beh tir tawp a rinawm lo a; Mane, Coman, Jamal Musiala, Thomas Muller, Serge Gnabry leh Leroy Sane te awmna a nih avangin Paris tlarhnung rum ṭhaih tura a naute fuih a phur khawp ang.

Neymar season a tawp

Paris St-Germain forward Neymar chu a ke rek hliam zai a ngaih dawn avangin tun season-ah a inlan tawh dawn lo. Brazil forward hian German a hmachhawn ve thei dawn lo tihna a ni.

February 19 khan PSG-in Lille 4-3 in an hneh a, hemi ṭum hian Neymar hi zawn chhuah a ngai. Kum 31 mi Neymar hian a ke rek dinglam a ring ngam lo a, a hliam tawrh hi a thlen nawn loh nan zai turin thutlukna an siam.

Neymar hian a ke dinglam hliam a tawk fo a, 2022 World Cup-ah pawh khan match hmasa bera Serbia nen an inkhelh ṭuma a inliam avangin match hnih a awl.

Barcelona forward hian ke rek hliam vangin 2019 Copa America-ah a tel thei lo a, ke rek hliam vang thoin 2021 khan hun rei tak a chawl bawk. Tun ṭuma inhliam vang hian Neymar tan training zawm tur chuan thla thum aṭanga thla li tal a mamawh dawn.

Neymar hian tun season-ah PSG tan match 28 khelin goal 18 a khung. Ligue 1 bikah match 19 khelin goal 13 a khung a, PSG tan Neymar khel thei lo tur hi channa lian tak a ni thei ang.

Paris a thil thleng

Bayern Munich-in Parc des Princes-ah hnehna an chang a, Kingsley Coman chuan minute 53-naah goal awmchhun a khung. Coman hian 2020 UCL final-a Bayern-in PSG 1-0 a an hneh ṭumin goal awmchhun a khung tawh bawk.

Bavarians hi first half-ah an che ṭha a, second half tir lamah pawh an chungnung zawk. Mahse, minute 57-naah bench aṭangin Kylian Mbappe a rawn lut a, Bayern tlarhnung an buai phah hle. Inhliam dam hlim Mbappe hian minute 82-naah siphurh sutah inngai mah se offside vangin pawm a ni lo.

Bayern an ṭang tluan a; Lionel Messi, Neymar leh Mbappe te inkawp an chelh. First leg-ah 1-0 in inkhel a tawp a, German club dinhmun ṭha hret mah se Allianz Arena-ah eng result pawh thleng thei a ni.