Ten Hag-a'n Liverpool laka mualphote a hrem

Manchester United-in Pathianni zan khan Anfield an tlawh a, Erik Ten Hag-a hoten Liverpool 7-0 in an hneh lo.

Dutch manager Ten Hag chuan a player-ten thil thleng an theihnghilh tawh loh nan Thawhṭanni zing training-naah Liverpool hlim/lawm thawm chu dressing room-ah ngawi rengin a ngaihthlak tir niin khawthlang media-te chuan an ziak.

Man United hian season tir khan Brentford chu 4-0 in an hneh lo a, hemi ṭum hian Bees player-te hi 14km-in an tlan tam zawk. Ten Hag chuan an chak loh tukah player-te chu 14km a tlantir.

English club hian sports psychologist Rainier Koers an nei a, tun ṭuma Reds an hneh loh avang hian player-ten Koers hi a hma aiin an hmu tam sawt dawn bawk.

Man United-in FIFA World Cup hnua harhtharna an chang a, result ṭha nei chho char char mah se an chak loh meuh chuan, an chak lohna a tam bawk nen sawiseltu an ṭhahnem hle.

Premier League-a Blackburn champion puitu Chris Sutton chuan Bruno Fernandes chu khelmuala a chet dan avangin captain tlak a nih tawh loh thu a sawi. Portuguese midfielder Fernandes hi vice captain a ni a, Harry Maguire-a'n khelhna hmun a chan phak loh avangin captain tlukin armband a hreng ngun.

Man United hian March 9, Ningani zan hian Real Betis an mikhual a, engti chiahin nge an insiamṭhat tih chu Europa League last 16 an khelh hunah hian a hriat theih ang.