Spurs an tho thei dawn em?

Tottenham Hotspur-in tun hnaiah result an nei ṭha hleithei lo a, Antonio Conte naute hi Premier League top four-a an dinhmun meuh pawh a derthawng tawh - insiamṭhat an mamawh hle.

Spurs hian zanin dar 1:30-ah Champions League round of 16, second leg match khel turin AC Milan an mikhual dawn a, first leg-ah 1-0 a an lo tlawm tawh avangin Conte naute hi an tho thei ang em, tih chu zawhna awm mek a ni.

London club hian Milan laka an tlawm hnu khan league-ah a zawnin West Ham (2-0) leh Chelsea (2-0) an hneh a, mahse, FA Cup fifth round-ah Sheffield United chu 1-0 in an hneh lo a, league-ah Wolverhampton Wanderers chu 1-0 in an ngam lo zui.

Spurs hi a zawnin an chak zo lo tawh tihna a ni a, Milan tan Tottenham khelmuala lenluh a châkawm lai tak a ni ang - Italian club tan quarterfinal lut turin an goal neihsa humhim a tawk e.

Mahse...

AC Milan hi an boruak ṭhat vanglai a ni bik lo. Italian champion hian Serie A-ah an nomawi kawl lai an humhim a rinawm tawh lo a, match 25 khelh tawhah hmahruaitu Napoli chu point 18 ngawtin an phak tawh lo.

Hei chauh a ni lo - an league match hnuhnung berah Fiorentina chu 2-1 in an ngam lo a, Spurs ang thoin zanin an inkhelh hmaa an match hnuhnung berah an tlawm. Boruak ṭha tak hnuaiah an awm bik lo.

Chu mai a ni lo. Milan fans tan chanchin lawmawm lo hriat tur a awm a, striker Olivier Giroud chuan damlohna avangin club training a zawm thei lo. Premier League-a tawnhriat nei ṭha striker hian Spurs a hmachhawn a rinawm lo zawk.

Milan tan chanchin lawmawm hriat tur erawh a awm tho. Spurs nena an intawn hmasaka inlan thei lo, first-choice goalkeeper Mike Maignan hliam a dam tawh a, Tottenham tlarhma tan hriat nuam a ni lo ang.

Hei le Conte

Antonio Conte-a'n mît (gallbladder) zai vangin Spurs a enkawl thei lo reng a, in lam aṭangin phone hmanga a assistant Cristian Stellin be pawp reng chungin inkhel a enkawl a ṭul - zaninah erawh a rawn kir dawna sawi a awm.

Conte a lo kir chuan Spurs hi an hriam sawt tura beisei a ni a, chutihrual chuan a mît zai hlima Leicester City laka a lo kir khan 4-1 ngawtin an tlawm a, a chawl hahdam leh zui.

Hetihlai hian Spurs defender Ben Davies chuan, "Game pawimawh tak kan nei a, min ho theih chu kan tan a pawimawh khawp ang," tiin a sawi a, Conte hoin team danglam an nih ṭhin thu a sawi.

Spurs assistant coach Stellini pawhin Davies ngaihdan hi ṭawmpuiin, "Season tawp thlenga kan ṭan mar pat theih nan Antonio hi a pawimawh a, a lo kir hi a ṭul. He team hian Antonio hmaah kan la thi lo tih kan pholang a, hnehna chana inkhel thunun kan duh a ni," a ti.

A lawmawm lam

Spurs-in an league match hnuhnung berah hnehna chang zo lo mah se, Milan hmachhawn hmain chanchin lawmawm hriat tur an nei nual a, zaninah thatho takin Italian club an lo mikhual thei ang.

Zaninah hrem vangin Eric Dier inlan thei dawn lo mah se Wolves lakah pawh an chhawr tawh loh avangin, a tel loin an tlei tawk, tiin a sawi ngam a, San Siro-a a awm loh langsar tak Pierre-Emile Hojbjerg a inlan thei tawh dawn thung.

Spurs player zingah Ryan Sessegnon, Hugo Lloris, Yves Bissouma leh Rodrigo Bentancur te chu hliam vanga inlan lo tur chiang an ni a, Fraser Forster chuan si ban nghak zuiin, Clement Lenglet, Cristian Romero leh Ben Davies ten tlarhnung lam an venpui thei ang.

London club hian tlarhmaah Harry Kane, Son Heung-min leh Dejan Kulusevski an neih avangin a ngaihṭhatthlak a, hetihlai hian Milan tan first leg-a goal khungtu Brahim Díaz chuan hliam vangin amahin training a nei a, Diaz hi a inlan thei lo a nih chuan Rafael Leão mawhphurhna a sang lehzual dawn.