Australia-in Saudi Arabia telh an duh lo!

Football Australia thuneitute chuan 2023 Women's World Cup an thlen tura Saudi Arabia inrawlh tur chu an duh lo a, football khawvela thuneitu sang ber FIFA chuan hemi chungchangah hian hma a lak vat an beisei.

July 20 aṭanga khelh ṭan tur Hmeichhe World Cup hi Australia leh New Zealand ten an inthlen ṭawm dawn a, Saudi Arabia sorkar hnuaia tourism lam chu sponsor zingah telin, 'Visit Saudi' chu official sponsor tur niin media ṭhenkhat chuan an tarlang.

Hemi chungchangah hian inelna thlengtu ram pahnih hian FIFA chu insawifiah turin an phut a, FIFA aṭang hian chhanletna la hmu chiah lo mah se Australia leh New Zealand chuan an rama inelna an thlen tura Saudi sorkar lo inrawlh ve hi an rem ti lo.

Saudi Arabia hi tun hnaiah mihring dikna chanvo rahbeh chungchangah a hmingchhe hle a, hemi boruak karah hian infiamna khawvelah sum tam tak sengin an inrawlh a, mi tam tak chuan an hmai bal phih fai tumna chi khatah an ngai.

Hmeichhe World Cup sponsor tur zinga Saudi tel chungchangah hian US Soccer Federation (USSF) chuan FIFA hnenah an ngaihdan an thlen tur thu an sawi tawh a, mihring dikna chanvo humhalh pawl Amnesty International chuan, "Midang ngaihtuah miah loa hmalakna," tiin na takin an lo sawisel tawh bawk.

Football Australia chief executive James Johnson chuan, "Hmeichhe World Cup-a sponsor zinga Saudi sorkar tel chungchangah, he World Cup thlen a nih theih nana tha thawhtu, sorkar leh sumdawnna lama thawhpuite kan rawn vek a, keinin he inelna katlanga tih kan tum tam tak leh FIFA hmalak dan ṭhenkhat hi a inrem lo, tih kan pawm tlang a ni," a ti.

James Johnson chuan, "FIFA chuan Saudi sorkar nena an thawhdunna chungchangah hian engmah la sawi chiang lo mah se, kan thawhpuite nena kan indawrna leh keimahni ngaihdanah pawh, he thawhhona hi kan duh lo," an ti a, Football Australia leh New Zealand Football chu an dinna ngaia an din reng thu an sawi.

Saudi hian khawvel mit hmuha an mawi lohna thup bo tumin tun hnaiah hma an la nasa hle. Kum 2012 khan a vawi khat nan Olympic-ah hmeichhe infiammi an tir a, kum 2018 khan a vawi khat nan hmeichhiate chu stadium-ah inkhel en an phalsak bawk.

Saudi Arabian Football Federation chuan kum 2018 khan an board of director-ah hmeichhe pahnih a vawi khat nan dah telin, kum 2019 khan hmeichhe football enkawl tur bik department an din a, kum 2020-ah Women's Football League dinin, thla hmasa lawk khan FIFA women's world ranking-a lan ve duhin, ram pali inelna hmeichhe football tournament an buatsaih bawk - hma an la nasa hle.