Brentford tan European football a hnai!
An tan chuan Premier League khel tura tlin ringawt pawh kha a hlu a, English football inelna sang bera an inhamtan theih avangin season hmasa khan an lawm hle - tunah chuan Brentford hian European football an beisei ngam tlat.
Bees hian Thawhṭanni zan Premier League inkhel awmchhunah an elpui Fulham chu 3-2 in an hneh a, match 24 aṭanga point 38 hmuin table-ah pakuana dinhmun an luah, tuna an thlen chin hi a nep lo hle.
European football zinga hniam ber - Conferance League khel chin chu pasarihna an ni. Tun dinhmunah Fulham hi pasarihna an ni a, point 39 an nei thung - Brentford hian point khat chauhin an phak lo, match hnihin an khel tlem zui.
An khel ṭha
Thomas Frank-a nauten bul an ṭan fuh takzet, minute rukna lekah Ethan Pinnock chuan goal hmahruai a khung, hemi hma pawh hian goal khung theihna tur remchang ṭha vawi thum ngawt an insiamsak hman hial.
Season ṭha tak hmangtu Fulham an zam bik lo, chawlhlawk hmain si phurh an sut. Andreas Pereira-a freekick petin goal ban a per a, ball per let leh hi Israel forward Manor Solomon chuan khungin, 1-1 in chawlhlawk an hmang.
Second half tirah Brentford bawk an che fuh. Bryan Mbeumo leh Ivan Toney ten woodwork an tihper a, minute 53-naah Issa Diop chuan Christian Norgaard lakah penalty a chawi a, a pet tura rawn ding chhuak Toney tan harsatna a awm lo.
English striker Toney hian Bernd Leno dan theih lohin a khung a, penalty a pet hnuhnung 22 teh meuh chu a khung vek. A tan penalty pet chu a chaw tui ber a ni ringawt, minute 85-naah Mathias Jensen hmangin an khung belh bawk.
Mikhual Fulham lamin hun tawp hma chiahin Carlos Vinicius hmangin goal khat an neih belh ve leh a, mahse a tlai lutuk tawh. Ni danga an player pawimawh Aleksandar Mitrovic leh Willian te pawhin an chhanhim zo lo a ni.
Hello Europe?
Gtech Community Stadium-a inkhel entu, mualneitu fans lamin inkhelh banah European football an besei thu an au chhuahpui, season hmasa leh tun season tir lama an beiseina nena ngaihtuah chuan an thlen chhin hi a sang takzet.
Manager Frank kaihhruaina hnuaiah Toney a hriam hle, tun season inelna hrang hrangah match 24 aṭangin goal 16 a khung tawh. Hliam nei loa a khel reng thei a nih chuan ani hi thlen sanpui tham khawpa theihna nei sang a ni.
Frank chuan, "Thil tum sang tak kan nei tur a ni a, a thiang bawk. Tunah hian kan dinhmun kan siamrem ve zel a, kan tih theih ṭha ber chu tuna kan khelh anga khelh chhunzawm a ni," a ti a, inelna lian leh sang lam a la sawi lang duh rih lo.
Fulham erawhin insiamṭhat an ngai. Premier League hmahruaitu Arsenal an mikhual zui dawn a, chumi hnuah Manchester United nen FA Cup quarterfinal an khel ang. Coach Silva chuan, "A tir lamah khan kan nawr na tawk lo, kan tuar zui bawk.
"Tuna kan result hi player-te nen kan sawi ho ang, engtiangin nge hma kan sawn theih ang tih chu kan ngaihtuah ho tur a ni ang," tiin a sawi. Gunners lakah point khat tal hlawhchhuah tumin an beih ngei a rinawm.