Lillard hoin Blazers an chak

Damian Lillard-a triple-double hmangin Portland Trail Blazers chuan nimin zing khan Detroit Pistons chu 110-104 in an hneh a, a thiam zual pariat inelna playoff khel phak turin an dinhmun an siamrem chho ve mek zel.

Lillard hian point 31 a neih bakah rebound vawi 13 a la a, assist ṭum 12 a nei bawk. Lillard-a'n quarter hmasa berah point 16 a nei nghal a, a team hi 31-18 a hma hruaipui nghalin an chak theih nan a thawh hlawk hle.

Portland Trail Blazers coach Chauncey Billups chuan, "Kan mamawh hunah tak a lo ding chhuak a, ni dangah pawh a lo tih fo tawh angin hnehna min rawn chanpui," tiin a player a fak.

NBA regular season kal laiah Blazers hian vawi 31 hnehna an chang tling ta chiah. Western Conference table-ah 10-na an la ni a, pariatna Los Angeles Clippers chu ṭum 34 an chak tawh thung.

Nimin zing inkhel dangah Sacramento Kings chuan New Orleans Pelicans chu 123-108 in an hneh. Kings tan Domantas Sabonis (19 point, 11 rebound & 11 assist) a khel ṭha, season kal laiah vawi riat ngawt triple-double a nei tling ta a ni.