AIFF-in India keeper hlui Sampath a ui

India rama football thuneitu sang ber, All India Football Federation chuan India international goalkeeper hlui Kuppuswami Sampath thihna chu an tawrh thu an puang a, kum 75 mi a ni.

India tana vawi 18 inlan hman Sampath hi Thawhṭanni khan Bengaluru-ah a thi a, a nupui leh a fanu a kalsan. Sampath hian India tan match a khel tam tawk lo angin lang mah se, 1970 & 1972 Merdeka Cup, 1970 Asian Games leh 1971 Pesta Sukan Cup-ah te khan Blue Tigers jersey hain a inlan a ni.

AIFF president Kalyan Chaubey chuan, "India goalkeeper K Sampath thihna hi Indian football tan chuan chânna nasa tak a ni. Kum 1970 chho khan goalkeeper ṭha ber pawl niin, a hming hi hriatreng a ni tawh ang.

"Goalkeeper ni tura zinkawng ka zawh lai khan 1970 Asian Games-a a khelh dan kha hrilh ka ni ṭhin a, chu chuan nasa takin phurna min pe ṭhin a ni," a ti a, Chaubey hi goalkeeper hlui niin, Mohun Bagan leh East Bengal tan pawh a lo khel tawh.

Sampath hian Asian Games 1970-ah hian India chu bronze medal a hlawhchhuahpui a, pathumna inchuha Japan nen an inkhelh ṭuma a save ropui chu tun thlengin sawi a la hlawh - Japan striker ropui Kunishige Kamamoto-a shot chu ṭha zeta dangin, India chu 1-0 in hnehna a chanpui a ni.

Santosh trophy-a Services leh Goa tan pawha khel tawh Sampath hian 1970 Merdeka Cup-ah khan India chu pathumna a nihpui bawk a, Singapore-a khelh 1971 Pesta Sukan Cup-ah India chu joint champion a nihpui bawk - final-ah Vietnam nen inhnehtawkin champion ve veah an puang.

AIFF secretary general Dr Shaji Prabhakaran chuan, "K Sampath thihna hian Indian Football a ti ngui êm êm a, a chhungte ka tawrhpui takzet. Thlamuangin chawl rawh se," tiin India keeper chhuanvawr ṭhin chu a thlah ve bawk.

Sampath hian Bangalore club Madras Engineering Club tan 1960 - 1972 inkar kha khelin, Dempo SC tan 1973 - 1978 inkar kha a khel bawk. Goan club tan hian 1974 leh 1978 khan Rovers Cup-ah champion nomawi a chawi a ni.