Premier League-a khelh châk Victor Osimhen

Serie A season kal laia goal khung hnem ber, tunlai football khawvela striker ṭha zinga mi Victor Osimhen chuan Premier League khelh a châk tih a sawi. Goal khungtu mamawh club tan chet ran a finthlak ang.

Kum 24 mi Osimhen hian tun season Serie A match 21 aṭangin goal 19 a khung tawh, a kum a la naupangin hmabak êng tak a nei. Tharum a ngah a, goal hmaah a hriam hle - a khelh dan leh English football pawh a inmil viau tura ngaih a ni.

Osimhen chuan, "European League lian panga zinga khelh phak hi chu thil lawmawm tak a ni vek, tunah chuan ka tan Serie A hi hmun nuam leh hlimawm tak a ni mek a, nuam ka ti takzet.

"Player tam tak chuan Premier League khelh an châk ṭhin a, league harsa leh khauh tak a nih thu pawh an sawi ṭhin. Tun dinhmunah erawh ka tan chuan Serie A hi hmun ṭha ber a ni rih," a ti.

A hma hun zawhna chhangin Osimhen chuan, "Tun hma pawhin ka lo sawi tawh, engtik niah emaw chuan Premier League ka la khel ve ang tiin duhthu ka sam ṭhin, hei vang hian ka chhuak nghal ang tihna erawh a ni lo.

"Thil reng reng hian hun leh hmun a nei, chuvangin kei pawhin ka tana ṭha ber tur ka ngaihtuah thiam a ngai," a ti. Nipui bazarah chuan European club lian hoin an inchuh ngei a rinawm.

Manchester United, Chelsea leh Arsenal te chu Osimhen ngaihven zinga mi an ni a, Nigeria internatonal lei chhuak tur erawh chuan sum hman hnem an huam a ngai khawp ang.

Osimhen hian Napoli chu Serie A nomawi a chawipui ngei dawn niin a lang tawh. Naples khaw club hian Diego Maradona hunlai bakin Italian football inelna sangah hian nomawi an la chawi ngai lo, mellung pawimawh phun theihna remchang an nei mek.

Champions League-ah pawh quarterfial an luh ngei a rinawm - Eintracht Frankfurt lakah 2-0 in hma an hruai mek. March 16-ah second leg an la khel leh dawn a ni.