Chelsea an chuai lo, an 'Chak' a ni zawk!

Chauh chang nei ve mah se Chelsea nge nge kan ti leh thei ta, inkhel hmuhnawm chhawp chhuak chungin Blues chuan an mikhual Borussia Dortmund 2-0 in an lo hneh. English club hian German club hi an lehthal a, inkhel pahnih belhkhawmin 2-1 in an chak.

Raheem Sterling leh Kai Havertz te goal hmangin Chelsea hi an chak a, season an hman chhiat avanga sawiselna hrang hrang an tawrh karah pawh Champions League quarterfinal chu an lut phak ta tho. An thlen chin sanzia chu UCL khel phak lo hoin an hrechiang ang.

Thawhlehni zan Champions League last 16 second leg inkhel dangah Benfica chuan Club Brugge 5-1 in an hneh, first leg-ah Portuguese club hi si hnih faiin an lo chak tawh bawk, a pahnih belh khawmah 7-1 in an chak tlang a ni.

Sterling awmna

Chelsea buaina lian ber chu goal khung an harsat hi a ni. Kar tawp Premier League-a Leeds an hneh ṭumin fans chuan an goal khung avanga lawmthu sawina an au rual pui hial a, an lawmna hi European football-ah an chhunzawm avangin an lawm zual ang.

Inkhelh hmain Graham Potter-a'n Raheem Sterling chu bul a ṭantir tur thu a sawi lawk. English forward hi European football huangah tawnhriat nei ṭha, goal khung bakah assist nei thei tak a ni, coach-in duh a thlang sual lo hle.

Minute 43-naah Sterling hian box chhungah ball a chang a, inringtawk takin amah vengtu a bum hnuah Dortmund keeper Alexander Meyer dan theih lohin a khung, first leg-a 1-0 a an chak lohna chu an nihrual chiah, 1-1 a ni ta.

Second half tirah Ben Chilwell-a cross ball chu Marius Wolf chuan a kutin a lo khawih fuh a, penalty an chawi. Penalty pettu Kai Havertz-a'n a hlah, mahse penalty a pet hma hian player ṭhenkhat chu box chhungah an lo tlan lut hman.

Thil thleng hi VAR hmanga ennawn a ni a, penalty hi an pet nawntir. Havertz hian a petna lam sir ngaiah bawk a pet nawn a, a vawi hnihnaah chuan goal ban fuh tawh loin a chhungah a lut, goal len a puar pawp.

Chelsea an nung

Signal Iduna Park-a an inkhelh ṭum khan Borussia Dortmund lamin an ze pangngai an chhuah a, stadium chhungah mipui sing rual an lam mup mup - Chelsea neitu Todd Boehly chuan hmuhnawm tiin thla a laksak hial.

Stamford Bridge boruak pawh a nung - Dortmund ṭantute kalkhawm nual mah se, tun ṭum chu Blues fans lamin an luahkhat hneh a, a tir aṭanga a tawp thlengin mipui thawm a ṭha, an phu ang ngeiin hnehna an chang bawk.

Defender rinrawl Thiago Silva awm lo mah se Kalidou Koulibaly, Wesley Fofana leh Marc Cucurella te a laiah an intlar nghet ṭha. Ben Chilwell leh Reece James te theihna chu sawi nawn a ngai lo.

Enzo Fernandez-a'n player danglam bik a nihna a lantir zauh zauh a, a ke aṭanga ball chhuak a hlauhawm ṭhin. Tlarhma lama hlauhawm ber chu Sterling a ni, ani hian Dortmund tlarhnung a ngam viau, goal khat chauh a khung kha a vanduai tia sawi theih a ni.

Havertz hi Champions League final-a goal awmchhun khung tawhtu kha a ni, mamawh hunah chuan a la inlar thei reng. Sterling, Havertz leh Joao Felix te hi an inkawp rem chho a nih chuan UCL nomawi an lak theih lohna chhan tur a awm lo.

Potter a lawm

Champions League nomawi chawi puitu Thomas Tuchel an ban a, nomawi lian la chawi ngai lo Graham Potter an lalut a nih kha. Potter tan thil a awlsam vek lo, ban mai theih dinhmuna a din reng hnuin tun hnaiah chanchin lawmawm a nei ve leh ta.

English manager Potter chuan, "Player-te kha an che ropui hle a, chumi tluk zet chuan fans lam pawhin an hna an tlin. Team ṭha tak Borussia Dortmund kan hmachhawn a ni a, inkhel pahnih kha a pumpuia kan thlir a nih chuan chak kan phu zawk," a ti.

Chelsea manager chuan sawi zawmin, "Champions League quarterfinal kan lut ta a ni a, ka tan chuan hun chhinchhiah tlak bik zinga mi a ni," a ti a, penalty pet chungchangah chuan Kai Havertz a rintawk thu a sawi bawk.

Stamford Bridge bikah Chelsea hian nikum December thla khan Bournemouth 2-0 in an hneh, a hnu lamah inelna hrang hrang an khel leh nual tawh a, tun ṭum hi goal hnih an khung lehna hmasa ber a ni hial - goal an khung tlukin an chhuah lo kha lawmna tur a ni tel.

Premier League lamah 10-na an ni a, league aṭang chuan season thara Champions League khelh beisei ngam a harsa tawh. Chuvangin, UCL ticket an neih theihna hnai ber chu champion a ni a, chumi tur chuan player pawh an nei ṭha tawk.

Bellingham tawpna?

Rawlthar chhuak thar zinga ngaihven hlawh Jude Bellingham kha mipui mit fukna a ni a, European club lian dangte hellai a nih avangin nipui bazar tingaihnawmtu a ni dawn - Dortmund tana UCL match a khelh hnuhnung ber a ni mai ang em, tih chu zawhna lian tak a ni.

Kum 19 mi Bellingham hian yard riat lek aṭangin goal khungna remchang nei mah se a hlah. A ball khawih a hmuhnawmin hmathlir pawh a nei ṭha, mahse defender Reece James lakah a chet fuh loh vangin yellow card a hmu.

Edin Terzic enkawl team hian a zawna match 11 chak thei an ni a, kumin bikah Chelsea chiah hi ngam loh an la nei - thla li deuh thaw hnuah goal khung loa minute 90 an khelh vawi khatna a ni hial, an tan chuan Stamford Bridge kha anchhia a ni.

Dortmund coach Terzic chuan, "Chelsea khan tlang an phu tih chu ka pawm, mahse inkhel pahnih kha kan thlir kir a nih chuan keini pawhin hnehna chan kan phu ve tho," a ti a, midfielder Emre Can chuan an phu ang result an nei lo tih a sawi ve bawk.

Champions League aṭangin tla mah se Dortmund tan Bundesliga nomawi beiseina a la awm. German football inelna sang berah hian point 49 hmuin pahnihna an ni mek a, hmahruaitu Bayern Munich nen an point hmuh a inzat - Inrinni zanah Schalke an lenchilh lehnghal ang.