CYMA leh MTTA buatsaihin TT hmanga veng leh veng inelna a awm dawn

Central YMA leh Mizoram Table Tennis Association (MTTA) chuan table tennis hmanga veng leh veng inelna a buatsaih dawn.

LBS SUZUKI Inter Branch YMA Table Tennis Tournament chu April 11, Thawhlehni aṭanga khelh ṭan tura ruahman a ni a, April 8, Inrinniah ṭhuai hawnna (spin off) neih a ni ang.

CYMA Sports Sub Committee chairman R. Lalrinmawia (Marina) chuan, "CYMA hnuaia inelna a nih tawh chuan branch hrang hrang inpawhtlan nan a pawimawh ṭhin a, chutihrualin CYMA hian Mizorama infiamna hmasawn nan theihtawp a chhuah ṭhin," tiin Vanglaini a hrilh.

CYMA hian football, volleyball, basketball, cricket, badminton, rifle shooting, athletics, sepaktakraw, arm wrestling leh indigenous games te hlawhtling takin a buatsaih tawh a, tun ṭuma neih tur table tennis hi ṭum hnih a buatsaihna tur a ni.

Marina chuan sawi chhunvzawmin, "Branch hrang hrang hruaitute mahni branch member chauh khelhtir ngam ni se. Hlim tak leh inpawhtlang taka infiamna hmachhawn turin branch tel turte duhsakna ka hlan," a ti.

Entry fee hi Rs 500 a ni a, Central YMA Office-ah April 5, 2023 thleng pek theih a ni ang. Inelnaah hian mipa leh hmeichhe inelna a awm dawn bakah single leh team hmanga inelna a awm dawn. Single-a tel turte chuan entry fee pek rualin hming an pe tel nghal tur a ni.

Central YMA chuan TT inelna zawh hian football leh carrom inelna te a buatsaih leh ang. Nikum khan cricket leh volleyball inelnate hlawhtling takin a buatsaih tawh bawk.