UEFA-in Liverpool fan-te ticket man an kir dawn

European football-a thuneitu sang ber UEFA chuan Champions League 2022 final-a ticket leitu Liverpool fan-te chu ticket lei nana an pawisa sen a pe let leh vek dawn a, hei hi final a thil duhawm lo thleng vang a ni.

Real Madrid leh Liverpool ten final an khelhah khan fans tam tak chu khelmualah an lut thei lo a, Stade de France, Paris khawpuia gate pawna awm fans tam tak chu khelmual lut thei loa dan niin, tear gas hmanga hnawh darh an ni hial.

He thil thleng avang hian final kha minute 36 ngawtin tihkhawtlai a ni a, UEFA lamin a tirah ticket nei lo fan-te chu buaina chhuah chhanah puh mah se, uluk taka zirchianna neih a nih hnuah UEFA thiam loh a nih thu a zirchiangtu lam chuan an sawi a ni.

UEFA chuan, "Ticket kan kir tur hian Liverpool fan-te ticket lei 19,618 chu a vaiin a huam vek dawn a ni," an ti a, Champions League final entu Reds fan-te chu ticket leina an kir leh vek dawn, tihna a ni.

Liverpool fans intelkhawm pawl Spirit of Shankly leh Liverpool Disabled Supporters' Association chuan UEFA hmalaknaah lawmthu an sawi a, "Ticket leina man kir an rem tih avangin UEFA hian buainaa an thiam lohna an pawm tih a lang a ni," an ti.

UEFA general secretary Theodore Theodoridis chuan, "Mipui ngaihdan leh a bika zirchianna aṭanga lo langte ngaihtuah chungin, thutlukna dik tak kan siamah kan ngai a ni," a ti a, Liverpool fan-te thawhpuinaah an lawm thu a sawi bawk.

Champions League final-a thil thleng zirchianna chuan, UEFA leh French thuneituten pawn lam buaina chungchangah, ticket nei lo fan-te an puh chu awmze nei lo an nih thu an sawi a, "Tumahin nunna an chan lo chu thil lawmawm tak a ni a, Liverpool fan-te thuawihna avangin hliam na zawk tuar leh thi an awm loh phah a ni," an ti bawk - UEFA thiam loh a nih thu sawiin, Liverpool fans an fak.

Liverpool fan-te hian ticket hi club kaltlanga an lei a nih avangin, UEFA chuan ticket man kir kawngah Liverpool chu a thawhpui nghal bawk dawn a ni.

Champions League 2022 final ticket hi category 1,2,3 leh 4-a ṭhen hran niin, €70 (Rs. 6,055.85), €180 (Rs. 15,574.11), €490 (Rs. 42,391.27), €690 (Rs. 59,687.76) man te a ni hlawm.