Semifinal inchuh boruak a nung

Zarkawt BCA leh Khatla TBL te chu Mizoram Super League Season 8 semifinal khel turin an tling tawh a, pathumna ni lai Mission Veng Hotshots dinhmun a ṭha tawh viau bawk - hmun ruak pakhat la awm inchuh boruak a sang dawn.

Bungkawn LB Associates, Chanmari Vikings leh Tuikual South ten beisei an la nei vek a, tling thei vek an nih rual chiahin tla thei vek an ni bawk - khelh hmabak an nei tam tawh lo, match thum khelh tur an la nei.

Thawhlehni zan khan Bungkawn LB chuan an dinhmun sawhngheh theihna remchang nei mah se an chhawr ṭangkai lo. LB hian Champhai District BBA chu 96-92 in an ngam lo, tun MSL bika a vawi hnih nan Champhai an chak.

Inkhel dangah champion lai Zarkawt BCA chuan Mission Veng Hotshots chu 108-96 in an hneh thung, an chesual viau a nih ngawt loh chuan league hmahruaitu an ni tlang ang, vawi khat an chak leh chuan a chung berah an awm tlang dawn.