Hyderabad khelmualah beiseina nen Bagan

Zaninah Indian Super League semifinal pahnihna khelh a ni dawn a, team ṭha Hyderabad chuan ATK Mohun Bagan an mikhual dawn - zan dar 7:30-ah an inhmachhawn ang.

Hyderabad hi league round-ah pahnihna an nih avangin semifinal an lut sa a, Bagan erawhin a thiam pali zinga tel turin Odisha FC chu knockout round-ah 2-0 in an hneh.

League round chet ṭhat zarah Hyderabad an chawl rei zawk a, hahdamna hun an nei ṭha - ngaihtuahna fim tak nen Bagan an hmachhawn thei dawn a, a awlsam lo ang. Team pahnih hi league round-ah vawi hnih an lo intawng tawh a, 1-0 in, vawi khat ve ve an chak.

Chutihrual chuan Bagan hian an match hnuhnung pathumah hnehna an chan avangin inrintawkna an neih san vanglai tak a ni a, Hyderabad khelmualah tlawm an tum dawn bik lo.

Bagan an ṭha

ISL-a sum seng huai ber pawl chu Mohun Bagan an ni a, player pawh an duh ang chu an lalut - an sum sen dan thlir chuan final khelh an phu a, mahse, football hi sum aṭang ringawta teh erawh a rem lo.

Midfield-ah Scottish midfielder Carl McHugh leh Hugo Boumous chu innghahna ber an ni lehin a rinawm a, tun season-a goal 10 leh assist vawi sarih nei tawh Dimitri Petratos chu tlarhmaah chhuanvawr tur a ni.

Bagan hian Mizo player K. Lalṭhathanga (Puitea) leh Lalrinliana Hnamte an kawl bawk. Bethlehem Vengthlang tlangval Puitea hian knockout round-ah khan inkhel bul ṭanin a khel ṭha a, Terina'n bench aṭangin a thlak bawk.

Kolkata club hi bench-a NorthEast United thiampuipa ṭhin Federico Gallego leh forward ṭha Liston Colaco te bench-a dah thei an ni a, Odisha laka inhliam Ashique Kuruniyan a inlan thei lo a nih pawhin beidawnna tur a awm lo. Odisha nen an inkhelh ṭuma lakchhuah ngai goalkeeper Vishal Kaith pawh a dam tawh niin Vanglaini chuan thu a dawng.

Beiseina neitu

Puitea'n Kerala Blasters tana khelin season bul a ṭan a, mahse, season hmasaa South Indian club-in final an luh theih nana player pawimawh hi tun season-ah a tla tlum tawk lo a, January khan Bagan a pan.

DSK Shivajians aṭanga a professional career ṭantu Puitea chuan, "ISL-a team ṭha ber pakhat kan tum dawn a, a awlsam dawn lo. Tun hnaiah kan fixture a zing deuh a, khualmuala khel tur kan ni bawk - mahse, result ṭha erawh kan beisei," tiin Vanglaini a hrilh.

Puitea chuan sawi zawmin, "Kan match hnuhnung pathumah kan chak vek a, hei hian team boruak pawh a ti ṭha hle. Keimahni pawh kan inringtawk a ni," a ti a, chak an tum ngam.

Puitea hian Bagan hi final a luhpui thei a nih chuan season zawnin ISL final a khel dawn tihna a ni a, January-a sum senga Puitea leitu Bagan pawhin tifuh an inti khawp ang.

Hyderabad hi

ISL team hmuhnawm ber pawl an ni a, Hyderabad hi ISL champion lai an ni bawk - league match 20-ah vawi 13 hnehna chang chungin semifinal an lut a, league round-ah goal 36 zet khungin, an lamah goal 16 chiah a lut.

League round-a goal khung tam lamah Mumbai chiah an phak lo a, anni aia goal chhuah tlem an awm lo - a tawi zawnga sawi chuan goal khung an thiam a, tlarhnung lamah an khawng ṭha bawk.

Tlarhmaah match 19-a goal 10 leh assist vawi hnih neitu Bartholomew Ogbeche chu innghahna a la ni reng a, match 20-a goal nga khung tawh Javier Siverio pawh ngaihthah a thiang lo ang.

Match 17-a goal thum leh assist vawi ruk neitu Halicharan Narzary, match 20-a goal li leh assist vawi nga neitu Borja Herrera, match 18-a goal thum leh assist vawi li neitu Mohammad Yasir te hi ngaihthah an thiang lo.

Tlarhnung lam

Hyderabad tan Gurmeet Singh chu si ban nghak tura ngaih a ni a, a hmaa ding turin Akash Mishra, Chinglensana Singh, Nikhil Poojary, Abdul Anjukandan leh Athletic Bilbao aṭanga inzir chhuak Odei Onaindia te ho an awm bawk.

Spanish coach Manolo Márquez chu Hyderabad chakna langsar a ni a, kum 54 mi coach hian uchuak taka sum sengin, player langsar hlir lalut lo mah se a player-te ṭhatna a hrechiang ṭhin a, final luhna turin kum 54 mi coach thluak a pawimawh dawn.

Hyderabad neitu zinga mi Varun Tripuraneni chuan, "A hnathawh rim dan em em hi mak ka ti zawk a ni. Zing aṭangin a team ṭhat ber dan tur ngaihtuahin, a hun a hmang ṭhin," tiin Vanglaini hnenah a lo sawi tawh.

Nizams (Hyderabad sawina) hian goalkeeper Lalbiakhlua Jongte, midfielder Lalchungnunga Chhangte leh Mark Zothanpuia kawl mah se, an kum a la nau deuh avangin Mizo player-ten ISL team hmuhnawmah hian hmun pawimawh an chang phak rih lo.