Blades tan Premier League khelh beiseina a nung

Sheffield United chuan Premier League khelh beiseina chhi nung turin Thawhlehni zan khan Iliman Ndiaye goal hmangin khualmualah Reading 1-0 in an hneh.

Paul Heckingbottom hote hian match 35 aṭangin point 67 an hmu a, pahnihnaah an awm. Blades hian hmahruaitu Burnley chu point 10-in an pha lo a, an hnuai chiaha awm Middlesbrough aiin point sarih an sang thung.

Championship-ah club 24 an awm a, match 46 khelh tur a awm. A sang pahnihin Premier League an khel nghal dawn a, Blades hian English football-a inelna sang ber khel turin dinhmun ṭha takah ding mah se chesual thei an la ni.

Pathumnaa awm

Boro hi Michael Carrick enkawl a ni a, Manchester United legend-in a enkawl hnuah 22-na aṭangin pathumnaah an invawrh chho tawh. Boro hian kartawp khan Reading hi 5-0 ngawtin an sawp bawk a, Sheffield United tan fimkhur a ṭul ang.