India-in final an thleng thei dawn em?

India leh Australia chuan vawiin chawhma dar 9:30 aṭangin Narendra Modi Stadium-ah Test match vawi li an khelh tura a hnuhnung ber an khel ṭan dawn.

Border-Gavaskar Trophy-ah hian India-in 2-1 in hma an hruai mek a, Men in Blue hian Test match vawi linaah hian chak lo pawh ni se nomawi an kawl chhunzawm dawn.

Chutihrualin ICC World Test Championship thlir tel chuan India tan final khel turin Aussies hneh hi a ṭul thung. Test C'ship hi a vawi hnihna a ni a, a hmasa berah India-in final thleng mah se New Zealand lakah an tlawm.

Inelna kalpui dan hi a dang hret a, tun ṭumah hian kum 2021-2023 chhunga ram hrang hrang Test result kha lak khawm a ni. Heta ti ṭha pahnih hian final an khel dawn. Australia chuan match hnuhnung bera India an hneh avangin final an lut tawh.

Rohit Sharma hote tan midang result-a innghah loh nan 4th Test-a Australia hneh hi a tawk. Chutihrualin team pahnih hi an inhnehtawk emaw India hi an chak lo a nih chuan result dangah an inghah a ngai ang. Pathumna dinhmun luah mektu Sri Lanka-in an hmachhawn tur New Zealand laka 2-0 a hnehna an chan chuan Lions zawkin final an khel dawn.

Sri Lanka hian New Zealand hi 2-0 a an hneh thei lo a nih thung chuan India hian Australia hi hneh lo pawh ni se final an khel thei ang. Test cricket khel ram South Africa, England, Pakistan, West Indies, New Zealand leh Bangladesh tan final khelh beiseina a tawp tawh a ni.