Club Brugge tan Benfica an ṭha hret

UEFA Champions League last 16-ah Benfica-in Club Brugge lakah club lian zawk an ni tih an pholang a, khualmuala 2-0 a an hneh hnuah an mualah 5-0 in an sawp. Portuguese club hi last 16 chinah aggregate-ah 7-1 in a chak thei a, quarterfinal-ah tum châkawm an ni lo ang.

Ban hmabak Parker?

Estadio da Luz-ah Club Brugge tan chak a harsa dawn tih a chiang a, chutihrualin 5-1 ngawta tlawm erawh mualphona a ni. Benfica tan FIFA World Cup-a hming chher Goncalo Ramos-a'n goal hnih a khung bakah Rafa Silva, Joao Mario leh David Neres ten goal khat ṭheuh an khung.

Brugge coach hi Scott Parker a ni a, Bournemouth leh Fulham manager hlui hian December thla tawp lam khan Belgian club hi enkawl ṭanin vawi hnih chiah a lak chakpui. Paker chuan, "Ka hmalam hun ka hrethiam lo a, ka thuneihna a ni lo. Hetiang zawhna min zawh chhan hi ka hrethiam a, mahse thuneihna chelhtu ka ni lo. Kei chuan theihtawp chhuah chhunzawm zel ka duh," tiin a sawi.

Nikum August thla khan Liverpool-in Bournemouth 9-0 in an sawp a, Parker hian tun season ṭantirhah Cherries hi match li chauh a enkawl chungin ban a ni. Brugge midfielder Hans Vanaken chuan, "Kan result hi tawrh thiam a har a, goal kan chhuah awlsam avangin kan thil tawn hi a na lehzual," tiin a sawi ve bawk.

Benfica hi...

Benfica hian European Cup-ah kum zawnin an champion tawh a, amaherawhchu 1961 leh 1962-a Eusébio hoa an champion hnuah Europe inelna sang berah hian a la champion leh lo.

Chutihrualin Benfica hi Portuguese club ṭha zinga mi an la ni reng a, tun hnaiah phei chuan palyer an chher chhuah ṭhat avangin sum pawh an lalut hnem. Tun season nipui leh thlasik bazarah player hralhna aṭangin euro maktaduai 260 vel an lalut.

Hming langsar an hralh chu Enzo Fernandez (€121), Darwin Nunez (€75m), Roman Yaremchuk (€16m) leh Everton (€13.5) te an ni. Tuna Premier League-a player langsar City goalkeeper Ederson, defender Ruben Dias, midfielder Bernardo Silva leh Bayern Munich-a loan hmanga kal Joao Cancelo te hi Benfica chhuak an ni.

Benfica hian Enzo chauh hi manto takin an hralh lo a, kum 2019 khan Atletico Madrid hnenah Joao Felix chu euro maktaduai 126-in an rhalh tawh bawk. Tuna an player kawl zingah chuan club top scorer ni mek Goncalo Ramos hi nipui bazara manto taka hralh theih tur a ni a, chutihrualin player ṭha an chelh theih loh avangin European champion nih erawh a harsa ang.