Mumbai-in Sunil Chhetri an ngam lo
Indian Super League semifinal hmasa zawk chu Thawhlehni zan khan Mumbai Football Arena-ah khelh a ni a, mualneitu Mumbai City chuan 1-0 in Bengaluru FC an ngam lo.
Mikhual team tan Sunil Chhetri chuan inkhela goal awmchhun a khung a, Mumbai-in tun ISL-a goal 10 khung tawhtu Lallianzuala Chhangte kawl mah se a chhanletna tur goal an neih theih loh avangin an tlawm.
Mumbai tan hei hi thawnthu tawpna erawh a la ni lo - March 12 zanah semifinal second leg khelh a ni dawn a, mahse, Bengaluru khelmuala lenglut tur an nih avangin a awlsam lo ang.
Islanders (Mumbai sawina) thiampuipa Lianzuala chuan, "Away goal a awm lo a, a hma aia ṭha zawkin kan comeback theih ka ring. Pathian zara final luh ngei tumin theihtawp kan chhuah ang," tiin Vanglaini a hrilh a, a la beidawng lo.
Bengaluru an fuh
Season bul ṭan ṭha lo, season tawp lama insiamṭha Bengaluru an insiamṭhat chhunzawm zel a, coach Simon Grayson-a'n a team a hriatchian avangin tlarhnung lam ven uluk a ngai pawimawh a, a chesual lo.
Leeds United coach hlui hian tlarhnungah player panga dahin, counter attacking hmanga Mumbai nawr let a thlang a, Mumbai erawh an dan pangngaia 4-3-3 rawn hmangin an goal nawr pawh a na hle.
Islanders hian ball pawh an chang tam a, mahse, tlarhma lamah duh angin an hriam tawk lo. Bipin Singh, Lalengmawia Ralte, Greg Stewart leh Jorge Diaz ten first half-ah chance duhawm nei vek mah se, an chhawr thei lo.
Bengaluru tan Naorem Roshan chuan chance nei ve bawk mah se, a chhawr thei bik lo a, goal awm loin chawlhlawk an hmang.
A tawpah Bengaluru
Second half-ah inkhel thawnthu a danglam tam lo - Mumbai tan player thawkrim leh hriam Lianzuala'n chance vawi hnih nei mah se awmze nei loah a chantir a, Lunglei tlangval vanneih zan a ni lo.
Bangalore club tan minute 57-naah Sunil Chhetri a tlan lut a, India captain awm hnuah Bengaluru goal nawr a na sawt -Javier Hernandez-a'n chance duhawm hlah mah se, Chhetri erawh dan reng theih a ni lo tih a lang nawn.
Kum 38 mi striker hian a la tar lo tih pholangin, Naorem Roshan-a corner pet aṭanga ball kal chu minute 79-naah a tauh lut a, goal ṭha bik a ni- Chhetri hian goal dang khungna remchang pawh a nei a, mahse, Mumbai keeper Phurba Lachenpa chuan ṭha zetin a dansak.
Mumbai tan Greg Stewart chuan Chhetri-a goal khung hnuah chance a nei bawk a, mahse, Gurpreet Singh Sandhu chuan ṭha zetin a dansak - hun tawp thlengin goal dang a lut lo a, Bengaluru-in an game plan an chakpui, tiin a sawi theih.
A la tawp lo
Bengaluru-in an ruahmanna an hlawhtlinpui a, league ṭantir lama 4-0 ngawta an ngam loh Mumbai chu a hunah tak an hneh, tiin a sawi theih - match kua zet chu a zawnin an chak ta!
Hetihrual hian second leg a la awm miau a, chawlh hahdam a la hun lo. Mumbai forward Lianzuala chuan, "Kan khel ṭha zawk a, mahse, goal hmaah hna kan thawk ṭha tawk lo a ni. Set piece leh defence-a inhnawh chunga counter attack hmanga min nawr kha an tum ber a ni.
"An defender-te an palian a, keini tan cross ball hman ṭangkai a harsa hle bawk. Mahse, second leg-ah chuan thlir dan dangin kan hmachhawn tawh ang. A hmawr kan bawk fuh lo ṭhin a ni mai a, Pathian zarah kan comeback theih ngei ka ring," tiin Vanglaini a hrilh.
Lunglei tlangval Lianzuala chuan, "Mizoram mipuite min thlawpnaah lawmthu ka sawi a, min thlawp zel tur leh, ṭawngṭainaah min lo hre zel turin ka ngen takmeuh a ni," a ti a, Mizo mipuite ṭawngṭaipui turin a sawm.