Hliam tuar Man United khingpui tur Betis

Zanin dar 1:30 hian Manchester United-in Old Trafford-ah Real Betis an mikhual dawn a, Europa League last 16 inkhel tur hi kartawp inkhel result avangin ngaihven a hlawh. Erik Ten Hag-a hoten League Cup an champion aṭanga kar khatnaah Anfield an tlawh a, 7-0 in an mualpho.

Man United hian goal an chhuah tam mah mah a, chutihrualin Ten Hag-a hote hian ni 68 chhungin match 20 an khel a, hahdam hun an nei meuh lo. Red Devils-in match an ngah chhan hi season an hman ṭhat vang a ni a, League Cup nomawi an chawi tawh tih hriat a ṭha.

Amaherawhchu Man United hian nomawi dang an duh a nih chuan Europa League an lak thutak a ṭul a, Real Betis nena an inkhel tur hi an ngaihthah thiang lo. FIFA World Cup lai khan Real Betis leh Man United hian friendly match an khel a, Spanish club hian an mual Benito Villamarín-ah Nabil Fekir hmangin 1-0 in hnehna an chang.

Kar liam ta khan Real Betis hian an mualah La Liga nomawi humhim tum Real Madrid an chelh bawk a, hei vang hian Man United tan quarterfinal thleng turin first leg-a result ṭha neih hi a pawimawh hle.

Ten Hag-a'n damloh vangin West Ham an hmachhawn ṭumin Jadon Sancho a chhawr thei lo a, Liverpool lakah English winger hi a inlan lo bawk. Borussia Dortmund aṭanga Man United zawmtu hi bul ṭan thei zinga mi a ni.

Chutihrualin United ṭantute mit fukna tur chu Bruno Fernandes a ni a, Harry Maguire-a'n bul a ṭan phak loh vanga captain armband hrengtu hi Liverpool laka a chet danah an sawisel nasa hle. Ten Hag-a'n Fernandes chungah rinna a la nghat dawn a, vice captain hna a la chelh tur thu a sawi; Fernandes bakah hian Casemiro, Luke Shaw leh Lisandro Martinez te an insiamṭhat ngei a ṭul ang.

United khingpui tur Real Betis enkawltu hi Manchester City manager hlui Manuel Pellegrini kha a ni a, Chilean manager hian a khingpui tur hi a hrechiang dawn.

Spanish club vanduaina erawh friendly match an khelh ṭuma goal awmchhun khungtu Fekir chu khup hliam vangin a inlan thei dawn lo. Betis hian England-ah English club hi ṭum thum an hmachhawn tawh a, Chelsea lakah vawi hnih an tlawm bakah Liverpool nen 0-0 in an inhnehtawk - a tawi zawng chuan England-ah chak an la nei lo.

Betis tan Old Trafford-a result ṭha nei turin playmaker Sergio Canales a dam ṭhat hman a pawimawh dawn a, Juanmi tlan chakna an hman thiam a pawimawh tel ang. Ten Hag erawhin a tlarhnung a siksawi hret a rinawm a, Aaron Wan-Bissaka-a'n bul a ṭan a nih pawhin a mak lo ang.