Europa League Last 16 Arsenal inlan hun a thleng ve leh ta

Thla li chhung ngawt European football aṭanga an chawlh hnuah Arsenal chu zanin dar 11:15 hian Sporting Lisbon khelmualah an lenglut dawn. Mikel Arteta naute hi tunhma lama an sulhnu en chuan chak zawk tura rinkai an ni ang.

Gunners hi group hmahruaitu an nih avangin playoff khelh ngai loa tlangsa an ni a, pahnihna leh Champions League aṭanga tlate angin playoff an khelh hah a ngai lo, match hnih an awl phah tihna a ni.

Arsenal tlarhma

Nimin tlai khan khawthlang media hrang hrang chuan, "Portugal-ah Gabriel Jesus a zin ve dawn," tiin an ziak a, he thu hi Arsenal tan thil lawmawm a ni ang. Mahse, Jesus hi a zin a nih pawhin a inkhelh a la rinawm lem loh.

Arsenal fans lamin Jesus lo kir hun tur an nghakhlel, an ngahhlelh chhan hi Jesus ṭhat vang a nih bakah tlarhma lama rinrawl tur an mamawh vang a ni ve bawk. Sporting lakah tunge rintlak taka khel thei ang tih chu an inzawt nasa ang.

Eddie Nketiah chu hliam vangin Bournemouth lakah a inkhel thei lo, player thar Leandro Trossard pawhin hliam a tuar. Arteta-a'n loh theih lohna avangin Premier League lama a hman rim Bukayo Saka emaw Gabriel Martinelli emaw zawk chu a khelh tir a ngaih hmel.

Hliam dam hlim Reiss Nelson chu hmun chang chiang tura ngaih a ni. Nelson hian Bournemouth lakah chakna goal a khung bakah danglamna nasa tak a siam, chuvangin atan hmun a awm - Sporting tlarhnung tan ven ngai bik tur zinga mi a ni.

Arsenal manager Mikel Arteta chuan, "A theih a nih chuan match hmasaa chak nghal ka duh, kan chak lo a nih chuan mi tam takin eng vanga player siksawi nge kan nih min zawt leh dawn, chu bakah hna a hautak phah ṭhin bawk," a ti a, player ṭha a chawr a rinawm.

Bellerin awmna

Sporting Lisbon hian tun hmain Arsenal hi vawi li an hmachhawn tawh, hnehna an la chang miah lo a ni satliah lo - goal an la khung ve miah lo. An record chhe tak thai bo turin zanin thapui an thawh ang, hna erawh a awlsam lo mai thei.

Portuguese club hian Barcelona aṭangin Hector Bellerin chu loan hmangin an hawh mek. Spanish defender hi Arsenal aṭanga inzir chhuak a ni a, hun rei tak a lo chamchilh tawh leh a hriatchian club a hmachhawn dawn, coach Ruben Amorim hnenah thurawn pek tur a nei ang.

Sporting coach Amorim chuan, "Arsenal hi Premier League hmahruaitu an ni a, mawlmang taka ngaihtuah chuan kan tan hneh ngaihna an awm lo. Mahse, hei hi kan rilru put dan a ni lo, kei leh ka naute hian hetiang ang inkhel hautak hi kan lo hmachhawn tawh ṭhin.

"Kan vannei a nih chuan chak thei kan ni, chumi ring chung chuan mikhual kan thleng ang," a ti. Arsenal hi a hlau tak takin a rinawm lo a, a naute chawhphur nan a sawi mai a nih zawk a rinawm - a tak ram thleng thei tak ang maw.

Player a nih laiin Amorim hi Portugal tan a khel phak a, club lamah Benfica chu league nomawi vawi thum a chawi pui. Team enkawl hna a thawh chinah Portuguese League Cup a la tawh a, kum 2020 aṭang khan Sporting hi enkawlin team nghet tak a din tawh a ni.