Tum ram thleng lo 'PSG leh Messi' ; Bayern Munich 2 - 0 Paris Saint-Germain

Paris Saint-Germain-in European champion nih duhin sum ṭhahnem tak hlawh turin Lionel Messi an lalut a, Argentine forward awm hnua French champion thlen chin chu last 16 chauh a ni. Lionel Messi leh PSG ten an tum ram an thleng pha lo a, Christophe Galtier hote hian nomawi an hnaih lo hrim hrim.

Nilaini zan khan Allianz Arena-ah PSG an lenglut a, Paris-ah 1-0 a an chak loh avangin extra time thleng tur pawhin goal khat tal an mamawh. Amaherawhchu PSG hian Messi leh Kylian Mbappe te tlarhmaah inkawptir mah se Bayern Munich lakah goal an khung thei lo a, Bavarians-in Eric Maxim Choupo-Moting leh Serge Gnabry te hmangin goal an khung zawk. German champion hi aggregate-ah 3-0 in an chak.

Cancelo leh Neymar

Bayern-in thlasik bazarah Joao Cancelo an lalut a, Portuguese defender hian bul ṭan ṭha mah se goal venhim lamah a ṭangkai tawk loh avangin Julian Nagelsmann-a'n bul ṭan turin a ring zo lo.

PSG an hmachhawn hmasak ṭumin Benjamin Pavard chu hnawhchhuah a ni a, French defender hi khel thei lo mah se Cancelo aiin Josip Stanisic a ring zawk. Nagelsmann hian Stanisic hi league match hnuhnung pahnihah bul a ṭantir a, PSG an mikhual hun atan inbuatsaihna a nei ṭha.

PSG lamin Neymar an chhawr thei lo a, Mbappe leh Messi te an la awm tho. Player ṭha pahnih chawm tur hian Marco Verratti a awm thei a, tlarhnungah tawnhriat nei ṭha Sergio Ramos-a'n a ho thei bawk. An goalkeeper pawh Euro 2020 best goalkeeper Gianluigi Donnarumma a ni a, Neymar awm lo mah se kil tinah player langsar an kawl.

Hun ṭha bawhpelh

Goal mamawh PSG-in bul an ṭan ṭha zawk a, Mbappe hmangin an hlauhawm nghal. French forward Mbappe a ṭang ulh a, ṭhiante pe loa amaha pet a thlan avangin a khung lo a, ball a lak per hret avangin goal pawnah chiah a pet bawk.

Mipui mit fukna Messi pawhin hun ṭha a nei a, Argentine forward hi Aphonso Davies-a'n a tackle hram a, keeper Yann Sommer-a'n a dang leh a, hemi hnu hian Matthijs de Ligt a rawn inrawlh bawk.

PSG-in pressure an pek ṭhat avangin keeper Sommer-a'n a tisual a, Vitinha-a'n ball a chan hnuin keeper bum mah se a hmanhmawh hret a, goalline aṭangin De Ligt-a'n a tackle chhuak hman. Bayern an vannei takzet.

Lewy thlaktu Choupo-Moting

Bayern-in an striker chhuanvawr Robert Lewandowski an chân a, Bavarians innghahna chu Eric Maxim Choupo-Moting a ni. Cameroonian forward Choupo-Moting hi Stoke City tana a khelh hnuin PSG tan a khel a, French club aṭangin Bayern-ah a insawn.

Lewy thachhangdawltu ang leka ngaih Choupo-Moting hi rinrawla hman meuh chuan a rintlak hle. Second half-ah Bayern an insiamṭha a, minute 52-naah Choupo-Moting -a'n a tauh goal nghal. Mahse VAR hmanga ennawn a nih hnuah offside vangin pawm a ni lo.

Bayern-in PSG pressure an pe ṭha a, French club hian tlarhnungah ball an inpe kual ngam tho. Amaherawhchu PSG a hun loah an huaisen a, Verratti-a'n an box chhungah ball a chang rei hret a, Muller-a'n a tihpersak. Hemi per hi Leon Goretzka-a'n changin mahni hmasialna nei loin Cameroonian forward a pe a, Choupo-Moting-a'n 'bel chhunga sa' a hlah lo.

Nuamsa zawka Bayern an chak theih nan Sommer-a'n Ramos-a goal khung tur a dansak a, counter attack hmangin mualneitu hian PSG an nawr let ve reng bawk. Substitute Cancelo-a'n second half-ah a thiam thil rawn pholangin tlarhnung aṭanga ṭha taka a lakchhuah hnuah Serge Gnabry a pe a, Arsenal forward hlui hian ṭha zetin minute 89-naah a khung.

Liverpool forward hlui Sadio Mane chuan injury time-ah Bayern tan goal a khung belhah inngai mah se offside vangin pawm a ni lo. Bayern-in an mualah 2-0 in hnehna an chang a, chak phu zawk German club hi inkhel pahnih belhkhawmah 3-0 in an chak.

Engtin zel?

PSG hian UCL nomawi duhin manager langsar Carlo Ancelotti, Laurent Blanc, Unai Emery, Thomas Tuchel leh Mauricio Pochettino te an lalut a, an hlawhchham vek. Ancelotti leh Tuchel te hian French club-in an ban hnuah UCL nomawi an chawi leh tawh zawk.

French club hian manager langsar chauh an lalut lo a, player langsar pawh an lalut. Tun thlengin Barca aṭanga Neymar an lakluhna chu world record a la ni reng a, euro maktaduai 222 khum hi a harsa dawn. Monaco aṭanga Mbappe an lakluhna pawh euro maktaduai 180 vel a ni a, tam tham tak a ni.

Messi hian man nei lo mah se a hlawh tam bakah PSG a thlan avang hrim hrim hian euro maktaduai 30 vel (signing bonus) a dawng. Player langsar dang Ramos, Donnarumma, Achraf Hakimi, leh Nuno Mendes te an lalut.

Mahse, PSG hian tun thlengin UCL nomawi an la chawi lo. Messi luh hma hian semifinal leh final an thleng tawh a, Argentine forward luh hnuah last 16-ah Real Madrid leh Bayern Munich hneh loin an tla ve ve. PSG-in last 16-a team ṭha an hmachhawn chhan hi an thiam loh tho a ni a, 2021/22 season-ah group stage-ah Manchester City an tluk lo. Tun season-a an tluk loh erawh club tenau zawka ngaih Benfica an ni a, PSG hian Ligue 1 nomawi an humhim a nih pawhin tun season bik atan chuan a hlawhchham.

Messi ngam loh Bayern

A ṭum hnih nan Bayern Munich lakah Lionel Messi a mualpho. Messi telna PSG-in Paris leh Munich-ah goal an khung thei lo a, Argentine forward hian Barcelona kawr haa Bayern a hmachhawn hnuhnung berah a mualpho bawk.

August 14, 2020 khan Bayern chuan Messi telna Barcelona chu UCL quarterfinal-ah 8-2 in an sawp. Catalan club chhuahsanin sum hmang tam PSG zawm mah se Messi hian Bayern a hneh thei ta chuang lo.

Messi hian PSG a zawm hnuah UCL last 16-ah ṭum hnih a tla ta a, season liam ta khan Real Madrid hneh loin an tla. Season hnih chhung hian group stage-ah pahnihna ve ve an ni.

Argentine forward hian UCL nomawi a chawi hnuhnun ber chu kum 2015 daih tawh kha a ni a, hemi hnu lamah hian record ṭha a nei bik lo.

Messi hian PSG a zawm hma season hnuhnung parukah Barca hi UCL khelhpui vek mah se a thlen san ber chu semifinal chauh a ni. 2018/19 season khan semifinal-ah Liverpool an hneh lo a, PSG a zawm hma chiah hian Barca kawr ha chungin French club hi last 16-ah a hmachhawn a, an hneh lo.