Dina awmna TKS tan beiseina a la nung

Tuikual South chuan Chanmari Vikings hnehin Mizoram Super League season 8 semifinal khelh an beiseina an chhawm nung. F. Zodinthara awmna team hian Nilaini zan khan Vikings hi 90-80 in an hneh.

Phengphehlep hian match 12 aṭangin point 17 an nei a, table-ah pangana an ni mek. Zanin dar 8:30 hian Mission Veng Hotshots an hmachhawn leh nghal dawn a, an league round tawp ber atan Bungkawn LB Associates an la tum leh dawn bawk.

Vikings an hneh theih nana point 10 neitu, captain F. Zodinthara chuan, "A tawp thlengin kan bei dawn, kan match hmabak pahnihah hian kan chak a nih chuan kan tan kawng a la inhawng," tiin Vanglaini a hrilh a, kawng laklawha tawpsan mai an tum lo.

Tuikual South hian tawnhriat an nei ṭha tawh, inelna lian leh boruak sang an hmachhawn ṭhang tawh. Season tir lamah hliam vangin Dina a khel mumal lo, tun hnaiah erawh a hliam damin a inlan tam - TKS boruak a nung a, fans puihna an dawn ṭhat chuan an kang sang leh ang.

Nizan khan Bungkawn LB leh Zarkawt BCA an inkhela result kan hre hman lo. Palina ni lai Bungkawn hian BCA bakah Khatla TBL an tum zui dawn, a tawp kharna tur TKS a nih bawk avangin an tan hna a la hautak dawn hle.

Nilaini zan inkhel dangah Champhai District BBA chuan Khatla South Barons chu 81-78 in an hneh a, tualchhung basketball inelna sang ber an hmachhawn vawi khatnaah hian ṭum thum an chakna a ni nghal bawk.

Champhai tan result ṭha a nih laiin Barons erawh an harh chhuak thei lo. Khatla South team hian MSL8 match 12 an khel tawh a, an chak lo fai vek. An zahawmna humhim turin Zarkawt BCA leh Khatla TBL lakah result ṭha neih an tum a ngai dawn.