March 21-ah Subroto Cup Trial

Subroto Cup 2023 khel tur zawnna Preliminary Selection chu March 21-23, 2023 hian Aizawl leh Lungleiah neih a ni dawn. Subroto Cup hi India ram pum school inelna a ni a, category pathum Under 14 mipa bakah Under 17 mipa leh hmeichhia a awm.

Subroto 2023 Selection Committee chu March thlatir khan an ṭhu khawm a, category pathuma champion ngei tumin ṭan lak an tum a, a vawi khat nan treble champion ngei an tum.

Selection Committee-ah hian Directorate of Sports & Youth Services Dept, Mizoram State Sports Council, Education Dept leh Mizoram Football Association hruaitute an tel a ni.

Preliminary selection hi Aizawl, Champhai, Khawzawl, Saitual, Serchhip, Mamit leh Kolasib District te tan Rajiv Gandhi Stadium-ah March 21, Thawhlehni aṭangin neih ṭan a ni ang.

Hemi ni (March 21, Thawhlehni) vek hian Ṭhuamluaia mualah Lunglei, Hnahthial, Lawngtlai leh Siaha District te tan preliminary selection neih a ni bawk ang.

Subroto Cup hi India ram footballer langsarten bul ṭan nan an hmang tawh ṭhin a, chung zingah chuan India legend Bhaichung Bhutia leh Sunil Chhetri te an tel. Mizo player langsar S. Malsawmtluanga, Mizo trio tia hriat lar Malsawma, Jerry Zirsanga leh Vanlalrova, Robert Lalthlamuana leh player ṭhahnem takin Subroto Cup hi bul ṭan nan an hmang tawh.

Santosh Trophy hnuhnung bera Kerala champion puitu Bawngkawn rawlthar F. Lalnuntluanga pawh khan Subroto Cup (U14) ah Mizoram tan captain armband a hreng tawh. Tluangtea hi COE a awm hmain SYS enkawl football zirna Regional Sports Training Centre, Saidan-ah a inzir a ni.