Spurs an 'NIL' leh dawn ta

Tottenham Hotspur-in champion nomawi an chawi hnuhnun ber chu kum 2008 kha a ni a, rei tawh tak a ni - kum 15 lai a liam tawh a, tuna Spurs ṭantu zingah an nomawi chawi lai la hmu lo an awm nual tihna a ni.

Spurs nomawi chawi hnuhnun ber lah English football-a nomawi ngaihhlut hlawh lo ber tia chhal ngam League Cup a ni a, tun season-ah pawh nomawi an la chawi dawn chuang lo!

Tottenham Hotspur hian Nilaini zan khan Champions League last 16 second leg-ah AC Milan an mikhual a, 0-0 in an inhnehtawk. Inkhel hmasa zawkah 1-0 in Milan an lo chak tawh a, quarterfinal an lut ta zawk.

Spurs hian Premier League leh FA Cup-ah beisei tur an nei tawh lo a, League Cup-ah Manchester United an champion tawh a, Champions League aṭanga an tlak leh tak avangin nomawi chawi loin tun season chu an thlah liam leh dawn, tihna a ni.

Aw, a har ka ti mange!

Tottenham-in San Siro-ah goal an chhuah avangin Milan lakah goal khung an mamawh a, mahse, a tak ramah chuan goal khung mamawh lo ang maiin an khel a, "Aw, a har ka ti mange," tih hla ang mai an ni!

Mît (gallbladder) zai vanga rei tak a chawlh hnuah coach Antonio Conte-a'n khelmualah a naute a ho a, 3-4-2-1 hmanga a naute rawn remin, beisei ang erawhin Spurs an hmuhnawm lo.

Italian coach hian tlarhmaah player langsar Dejan Kulusevski, Harry Kane leh Son Heung-min te a tlar thei a, mahse, player nei ṭha lo ang maiin goal nawr an harsat a, tlarhma player-ten an duh ang ball an hmu tawk lo chu an buaina pakhat a ni.

Minute 77-naa a yellow card pahnihna avanga defender Cristian Romero hnawhchhuah a nih phei kha chuan Spurs tan besei a bo tawh tiin a sawi theih a, fan-ten an lungawi lohna an lantir pawh dem theih an ni lo.

Kane a vanduai

Spurs sawi ruala hming lo lang hmasa ṭhin chu Harry Kane a ni - English striker ropui hian a ropuina belhchhah turin a career-ah eng champion nomawi mah a la chawi lo a, champion nawmzia a la tem lo!

Tottenham tan match 423 a khelha goal 268 khung thei Kane hian Milan lakah goal khungna chance nei mah se a chhawr thei lo a, a ball tauh ṭha zet chu AC Milan keeper Mike Maignan-a ṭhatzia pholanna mai a ni.

Kum 27 mi keeper hian Pierre-Emile Hojbjerg-a shot ṭha zet chu a dang bawk a, Milan a chhanhim. Italian club tan hian Divock Origi chuan chance a nei ve bawk a, mahse, Liverpool striker hlui hian post a tihper.

Milan defender Fikayo Tomori hming lam hmaih a thiang lo. Chelsea-a hmun a chan phak loh avanga Milan pantu defender hi Italian club tlang theih nan player pawimawh a ni a, England manager Gareth Southgate-a'n a inkhel kha a lo en a nih chuan Three Lions tana inlan tlak a ni tih a hai lo ang.

Conte a chiang lo

Tottenham boss Conte-a'n Spurs-ah season tawp thleng cham turin contract a nei mek a, mahse, Italian coach hian a hma hun a chian loh thu a sawi - Chelsea boss hlui hian ban theih dinhmunah a ding tih a hai lo.

Conte chuan, "Tottenham-ah contract ka nei mek a, season tawpah ka awm zel dan tur chu kan ngaihtuah ang. June-ah ka contract a tawp tawh dawn a, enge thleng dawn chu kan hre zel ang chu - ka contract hman zawh hma pawhin min ban mai thei asin!

"Min beiseina a sang tih ka hria a, kan result avangin an hnual ngei ang. Coach tana pawimawh ber chu rim taka thawh a, kan thlen chin tihsan zel hi a ni. Kuminah erawh kan thei tlat lo a ni," a ti.

Conte chuan, "Fan-te pawi ka tihpui a, kan chak thei tlat lo. Engtikah emaw chuan nomawi kan chawi ngei ang, tih hi beisei ngam a ṭul a, chumi tur chuan dawhthei taka kan thawh zel a ngai. Chutihrual chuan fan-te an lo dawh thei lo deuh a nih pawhin ka hrethiam - rei tak nomawi an chawi tawh lo a ni," a ti a, hmasawn tura theihtawp an chhuah chhunzawm tur thu a sawi bawk.

Spurs chhungkua an buai?

Kum 53 mi Conte-a'n a kalna apiangah hlawhtlinna a chhar ṭhin a, a bik takin club lian tia chhal theih a enkawl zingah nomawi a chawi vek - Spurs tih lohah chuan!

Conte hian Juventus, Chelsea leh Inter Milan tan champion nomawi a chawi a, Spurs erawh November 2021 aṭanga enkawl ṭan chungin nomawi chawipui a la nei lo - tun season-ah a chawi dawn lo chiang bawk.

Milan laka an tlawm zawhah Spurs ṭantute khelmual chhuahsan chungin an zai rual a, "Mauricio Pochettino, in hriat kha - ani kha thilmak a ni," an ti a, an coach hlui an ngai.

Hetihlai hian Conte chuan club-in a hmachhawp leh a tumte an hriat thu a sawi a, a contract zawh huna contract thar ziak tur chuan club lamin a duhte an tihhlawhtlinsak a ṭul thu thiam taka a sawina niin a lang.

Conte chuan, "Hnehna chang tura bei turin lungphum nghet tak kan la nei tawk lo. Theihtawp chhuah a, he club tana kalphung nghet neih tumin kan bei a, transfer lamah kan buaina chingfel turin kan mit kan len bawk - club hian ka duh chu an hria a ni.

"Kan chairman nen kan inkarah buaina a awm lo a, ka hmachhawp pawh ka hrilh ṭhin. Eng pawh ni se, June thleng contract ka nei a, season hmang zo phawt ang.

"Tottenham-a thawh hi nuam ka ti a, a tawpah thutlukna chu kan siam ang. Club pawhin ka duhna leh hmathlir chu an hria a ni," a ti a, Conte hma hun a chiang lo zel.

Thil danglam ve tak chu Conte hian manager a nihna angin Champions League-ah hian ṭum ruk ngawt team a hruai tawh a, mahse, vawi khat chiah quarterfinal a thlenpui - 2013-a Juventus a thlenpui kha a ni a, European football-a a record hi uanpui tham a tling bik lo.

Hetihlai hian AC Milan laka bench aṭanga luhtir Richarlison chuan a lawm loh thu a sawi chhuak a, Brazilian forward chuan, "Zep ka tum lo - season hrehawm tak a ni a, inkhelh ka duh a ni.

"Conte-a duhthlanna hi ka hrethiam lo. Ka inpeih vanglai takin bench-ah min dah leh a, training-naah starting XI-ah min en chhin a, mahse, a takah erawh bench-ah tho ka awm," a ti a, Conte chunga a lungawi loh thu a sawi chhuak.

Pound maktaduai 60 thlenga man sang chho thei tur Richarlison hian nipui lai khan Spurs hi Everton aṭangin a zawm a, match 25-a khelhsak tawhah goal hnih chiah a la khung.