Vawiinah coach Thlanga pual exhibition match
Mizo football coach langsar H. Vanlalthlanga chu February 28, Thawhlehni khan a hnathawhna Sports & Youth Services aṭangin a pension a, vawiin hian RG Stadium-ah Thlanga enkawl tawh player-ten exhibition match an khel dawn.
Exhibition match-ah hian Thlanga enkawl tawh zawng zawng player tan a kal theih a, inkhel hi chi hrang hranga duan a ni. Chawhma dar 10:00-ah Chanmari FC leh Santosh Trophy-a Mizoram champion te ṭangkawp player-ten SYS (last match) an inkhel ang.
Match hnihnaah hian Subroto Cup U17 (2001, 2005) leh Subroto Cup U14 (2002) player-te an ṭangkawp ang a, an khingpui tur chu MFA Cup-a champion SYS team leh Subroto Cup U14 (2005-07) te ṭangkawp a ni dawn.
Chawhnu dar 1:00-ah hunserh hman a ni ang a, Thlanga enkawl tawh Rev Rory Lalrinsanga'n hun a hmang ang. Rory hi Bolton Wanderers (FC Kulikawn hming hmasa) captain pawh lo ni tawh a ni.
Hunserh hman zawh hian duhsakna thilpek hlanna hun a awm ang a, thusawi tawi a awm bawk dawn. Tlai dar 2:30-ah exhibition match lian ber a awm ang a, Thlanga enkawl tawh player-te chu team hniha coach Lalsangzuala Hmar leh coach HC Zarzoliana team-ah ṭhen an ni ang.
Mizo coach zinga MPL chawi hnem ber Sanga hi Thlanga hnuaia inzir a ni a; MPL-a Chanmari, Chhinga Veng leh Chawnpui champion pui tawhtu Sanga chuan, "Pathianin Thlanga bula min hruai avangin tun dinhmun hi ka thleng," tiin Chawnpui a champion pui zawhah a sawi.
MPL hmasa bera Dinthar champion puitu Zara hi Thlanga hian Subroto Cup-ah a hruai tawh a, Santosh Trophy-a Mizoram a champion pui khan assistant coach-ah a hmang leh bawk. Zara hi Mizo coach zinga nomawi chawi chikim ber ang hiala sawi theih a ni a, kum naupang aṭanga veteran football thlengin a team enkawl a champion pui tawh a ni.
Thlanga hian coach hna a ṭan hma avangin Mizo player langsar chu a enkawl deuh vek tawh a, exhibition match-ah pawh hian a enkawl tawh player Hrangzuala, F. Lalṭanpuia, B. Lalneihsanga, Ari Benjamin LR Hmar, Jack Manga, Khualkunga leh player langsar ṭhahnem tak an inlan ang.