Zaninah Tata SK 710 Fight Night

Tata SK 710 Fight Night 3 zan hmasa zawk chu zanin dar 8:00 hian Dawrpui Multipurpose Centre, Aizawlah ṭan a ni dawn. LPS Pro Fight welterweight champion C. Lalhruaitluanga'n round li khelh tluan ngai loin Arnab Chirua a hneh dawn tih a sawi a, fighter incho pahnih Lalrinngheta leh Nazareth Lalthazuala an intawng bawk ang.

Indian Boxing Council aṭanga inspector tura ruat Gaive Nagporewala kaihhruaiin nimin zing khan an inbuk fel a, zaninah inhnek vawi sarih a awm dawn a, round li zel tura ruahman a ni.

Boxing hi pay-per-view tur a ni lo a, LPS 1-ah live-a pek chhuah a ni ang. A hmuna en tur tan ticket 200 chiah siam a ni a, Rs 50-a hralh chhuah a ni ang.

Kum 25 mi Hruaia'n professional a luhchilh aṭangin a bitum a la hnek vek a, vawi nga chak zawn chungin Chirua nen an inhmachhawn dawn. Hruaia chuan, "Ka inpuahchahna a ṭha tawk a, ka inringtawk bawk a, round hnih emaw round thumah chuan kan zawh theih ka ring," a ti.

Fight Night 3-ah Assammese boxer pali an inlan dawn a, professional boxing an khelh vawi khatna tur vek niin mikhual ni chungin khawtual boxer ṭhate hmaah fiahna an hmachhawn dawn a, Chirua hmabak a hautak viau tura ngaih a ni.

India bantamweight number 1 Rinngheta'n LPS Pro Fight title kawl mekin, Indian Kickboxing champion leh Mizoram Mixed Martial Arts champion Nazareth Lalṭhazuala nen an inhnek dawn a, chak an inringtawk dun hle.

Kum 21 mi Rinngheta chuan, "January 29 aṭangin ka inbuatsaih tawh, chak ngei ka inring a, ka chak ngei bawk ang," a ti a, Tuipui tlangval hian professional boxing vawi hnih khel tawhin a chak ve ve a ni.

Muaythai-a tawn hriat nei tel Nazareth-a'n 2022 Pro Fight-ah quarterfinal lut mah se professional a khelh hmasak ber tur a ni. Nazareth-a chuan, "Bul ka ṭanna turah India rama number 1 ka tum thei tur hi ka lawm a, keimahah chona nasa tak min pe a, ka cho viau bawk a ni," a ti.

Cherhlun boxer F. Zoramchhana'n featherweight-ah Luangmual Vengthlang fighter Johan Lalrinpuia a hmachhawn dawn. February 4 khan Thailand-ah WBA Asia title chuhin a tlawm a, a hmain Pro Fight final-ah Rinngheta a hneh lo bawk a, atan insiamṭhatna hun a ni ang.