Juve-ah Kean a nghet

Italy striker Moise Kean chuan Everton aṭangin Juventus chu a nghetin a zawm. A man zat hi pound maktaduai 25 a ni a, a khelh ṭhat dana zirin pound maktaduai 2.5 thlenga la pung chho thei tura tih a ni bawk.

Kum 23 mi Kean hi loan hmangin Old Lady tana khel lai a ni, tun hnai season hnih chu Juve tan hian a khel tawh. Club pahnih inrem danah a ngheta lak theihna a awm, chu inremna chu an hmang ṭangkai ta a ni.

Kean hian 2019 khan Everton hi a zawm, mahse English club tan hian rinrawl a ni phak lo. Paris Saint Germain lamah pawh loan hmang bawkin a lo chhuak tawh, Ligue 1 club tan hian match 41 aṭanga goal 17 khungin French Cup a lakpui.

Serie A lamah Juve tan match 74 aṭangin goal 13 a khung a, league nomawi pahnih bakah Coppa Italia title a lak pui tawh bawk. A match hnuhnung bera Roma an hneh loh ṭumin, khelmual a luh aṭanga second 40 lekah an hnawtchhuak.

Kean khelhna Juve hi Serie A-ah pariatna an ni mek, dan an bawhchhiat avangin point 15 paihsak an ni. An tan season thara Champions League khelh phak a harsain a rinawm.