Dam chhung atan Al-Saleh an hrem

Syrian Football Association chuan an ram captain pawh lo ni tawh Ahmed Al-Saleh chu dam chhunga inkhel thei ve tawh lo turin an hrem, referee kut a thlak bakah chil chhak khumin ṭawngkam mawi lo tak takin a bei bawk.

Thla hmasa khan kum 33 mi Al-Saleh hi Al-Wathba player laka a foul avangin hnawhchhuah a ni a, red card a hmuh vanga lungawi loin Al-Jaish defender hi referee lakah a che zui ta a ni.

An khingpui player mai bakah a teammate ngei ngei pawhin ṭhelh an tum a, mahse a insum duh lo. Khelmual a chhuahsan hnuah pawh stadium bungrua ṭhenkhat a suasam zui tih video lamah a lo lang bawk.

Syrian FA hnuaia Disciplinary Committee chuan thu chhuah siamin, "Al-Saleh khan referee kut a thlak a, chu bakah mawi lo tak takin a che zui bawk. Inkhelh ban hnuah dressing room lam thlengin buaina a la siam zui bawk tih hriat a ni.

"Dam chhunga football khel thei tawh lo tura hrem a ni a, hei bakah hian Syria Sports Federation Organisation aṭangin a hming thai bo a ni, football ni lo infiamna dangah pawh a inlan ve thei tawh lo ang," an ti.

Hremna bakah hian pound maktaduai 1.5 chawitir a ni a, a khelhna club Al-Jaish chu pound maktaduai thum chawitir an ni bawk.