A car neihah Hamilton a lungawi lo!

Lewis Hamilton chuan Formula 1 intlansiak nana an hman Mercedes car chu a ṭha tawk lo tih a sawi a, season hmasa lama siamṭhat ngai leh hmasawn an ngaihna laite team thuneitu lam hnena a thlen chu an ngaihthlaksak lo tih a sawi bawk.

Britain tlangval hi mahni ngaihdan langtlang taka sawi hmiah mai chi a ni a, ama team ngei pawh a sawisel hreh ngai lo. Hetih lai hian Mercedes principal Toto Wolff chuan an tlawm dawn lo tih a sawi ve thung.

F1 season thar an ṭan chauh a, intlansiak hmasa ber atan Bahrain Grand Prix an tlan - world champion vawi sarih ni tawh Hamilton hi panganaah a thleng phak hram, nikum ang bawkin a bul an ṭan fuh tawk lo.

Hamilton chuan, "Car tam tak ka lo khalh tawh ṭhin, car in a mamawh leh a mamawh loh hrang hrang pawh ka hria. Nikum khan car chungchang uluk takin ka hrilh tawh, mahse hmasawnna thil ka hmu rih lo a ni.

"Kawng kawiah car chu a in balance ṭha tur a ni a, chumi ti dik tur chuan kan ṭhat tawk lohna lai kan enfiah tur pawh a ni. Mimala tih ṭhat ringawt a tawk lo," tiin a sawi, a thusawi hi Mercedes team lam tan inenfiahna tur a ni ang.

Bahrain Grand Prix-ah khan Red Bull car a tlan chak ber, a dawta tlan chak chu Aston Martin an ni. Ferrari leh Mercedes te chu Aston Martin hnungah an awm, team hlun tan zahna tur a ni.

Mercedes team principal Toto Wolff chuan, "Lewis hi team chhunga mi pawimawh leh ṭangkai tak a ni a, dinhmun ṭha loa kan din lai pawha min khai chhuak tawh ṭhintu a ni tih kan hre reng.

"Ani ho hian team champion vawi riat kan ni tawh a, driver champion pawh vawi ruk a ni tawh. Kan inzawmna leh inpawhna hi a thuk takzet, a thu sawi ang hian team dang elphak car kan chhawp chhuah a ngai," a ti.

Hamilton hi kum 38 mi a ni tawh, car intlansiakna sang berah hian hun a nei tam tawh bik lo. Driver champion nih hnem lamah Michael Schumacher (7 titles) nen an in nihrual mek, mimala record siam chu a tum ber pakhat a ni tih a chiang.

March 19, Pathianni zan dar 10:30 hian Jeddah Corniche Circuit-ah Saudi Arabian Grand Prix an tlan leh dawn a ni.