Club Brugge-in Parker an ban

Belgian club lar Club Brugge chuan an coach Scott Parker an ban a, England international hlui hian thla thum chiah a enkawl hman - hetih chhung hian match 12 kaihruaiin, vawi hnih chiah a chakpui thei a ni.

Club Brugge chuan, "Scott Parker hi Club Brugge coach a ni tawh lo," tiin thuchhuah tawi angreng tak an siam a, Bournemouth boss hlui hi an ngai lo hle!

Kum 42 mi English coach hian December 31 khan Club Brugge hi a zawm a, mahse, Belgian top flight league-a vawi 18 champion tawh team hi Champions League last 16 aṭangin a tlakpui a, league-ah hmahruaitu Genk chu point 21 ngawta phak loin, palina an ni mek bawk.

Club Brugge hian Thawhlehni zan khan Champions League last 16 second leg-ah Benfica chu 5-1 in an ngam lo a, first leg-ah 2-0 a an lo tlawm tawh bawk avangin, inkhel pahnih belhkhawmah 7-1 ngawtin an tlawm.

Belgian club thuneitu lamin an dawh zui thei ta lo a, a tawpah chuan Parker an ban - English coach Parker hian tun season ṭan dawn kha chuan Bournemouth a enkawl a, mahse, Premier League-a a inhlankaipui club hian match li chiah English top flight league-ah a kaihruai hman tihin an ban a, a match tawp berah Liverpool chu 9-0 ngawtin an ngam lo.

Parker hian Fulham chu 2019-2021 inkar khan a lo enkawl tawh bawk a, Premier League a lo hruai thleng tawh bawk - tunah erawh tun hmaa a hlawhtlinnate'n an chhan thei lo a, hna a nei ta lo!