Liverpool lawm chhung a rei lo!

Manchester United an sawp avanga an boruak san vanglai takin Liverpool chuan a hniam bera awm an hneh lo. Reds hi Bournemouth khelmualah 1-0 in an tlawm - Mohamed Salah chuan penalty a hlah.

Inrinni zana Premier League an khelh hma kha chuan Bournemouth hi table mawngphah luahtu an ni a, goal difference an nei chhe ber bawk. Mahse, inrintawkna sang tak nena feh chhuak Liverpool chu Philip Billing goal hmangin an lo hneh.

Goal khat a tawk

Gary O'Neil-a naute hian Arsenal an hmachhawn ṭum ang bawkin counter attack an hmang thiam hle. Dango Ouattara-a'n keeper Alisson thlenga a paltlang hnuah goal zawnah a pet lo, keeper bum kher loin shot nise a hlauhawm zawk mai thei.

Dango Ouattara bawkin Virgil van Dijk a paltlang, mual sirah Liverpool defender hi a tlan pelh hnuah a laia awm Billing tan a siamsak, ani hian yard riat leka hla aṭangin tun season EPL bika a goal rukna a khung.

Dutch defender Van Dijk-a ball tauh chu goal ban hrulah a liam a, substitute Diogo Jota-a hun ṭha bik pawh goalkeeper Neto-a'n a lo dansak, Portugal forward ball tauh in Adam Smith ban a per a, penalty an hlawh chhuak.

VAR hmanga en a nih hnuah Liverpool hian penalty an hmu, a pet tura Salah a rawn din chhuah kha chuan goal chiang tura ngaih a ni. Mahse, Reds tana league goal 129 khung tawhtu hian goal zawnah a pet lo.

Jurgen Klopp-a naute hian season thara Champions League an beiseina la nung reng mah se an elpui Tottenham an chak si a, an tan kawng a harsat phah ang. Bournemouth erawh a hniam ber aṭangin 17-naah a inhlangkai thung.

Harh a ngai

Liverpool manager Klopp chuan, "He inkhel hian min beng harh rawh se. Ser min siamsak se la, chu chuan kan hmabak atan harhna min thlen mawlh rawh se," tiin insiamṭhat nghal a duh thu a sawi.

Reds hian Nilaini zan hian Champions League last 16 second leg khel turin Real Madrid an tlawh zui dawn. Spanish club an mikhual ṭumin 5-2 in an chak lo a, tlang tur chuan Santiago Bernabeu-ah thil mak an tih a ngai dawn.

Kar tawpa Fulham nen Premier League an khelh tur erawh a hun sawn a ngai - Fulham hian FA Cup an khelh a ngai, chumi hnuah international break an nei zui ang.

April thla hi Reds tan Premier League lama fiahna hautak a ni zui dawn. Champion lai Manchester City leh tun hnaia harh thar Chelsea an lenchilh dawn, match hautak pahnih hnuah Arsenal an mikhual leh dawn.

Klopp-a'n season bul an ṭan fuh loh avangin team thar a din leh mek a, a team din hi nghet taka kalpui leh tur chuan hun an la mamawh ve deuh dawn niin a lang - UCL khel phak chin tala season khar an tum ang.

Cheries tan a hlu

Nikum November thla khan Gary O'Neil-a'n a nghetin Bournemouth a enkawl ṭan a, a hnu lamah tun ṭum hi hnehna an chan vawi hnihna chauh a ni a, anmahni khelmualah bik an chak vawi khatna a ni.

Arsenal lakah 2-0 in hma an hruai fal hman a, hun tawp dawna an goal chhuah vangin 3-2 in an chak lo. Reds lakah pawh fans lamin hun tawp hma chu awm dan tur an thiam lo, hlauthawng takin hamrik hnuhnung an nghak thleng.

Scott Parker thlaka Cherries enkawltu O'Neil chuan, "Arsenal laka kan tawrhna kha a damdawi an duh leh duh lo ka zawt a, ka naute chuan an duh. Chumi damdawi chu tun ṭuma hnehna chan hi a ni," a ti.

Bournemouth hian relegation zone an chhuahsan rih a, mahse an awmna erawh a la nghet lo - match khat lek chetsualah dinhmun hniam leh mai thei an la ni. An match hnuhnung pahnih thlir erawh chuan beisei an nei sang ngam ang.

Hnehna an chan bakaha Cherries hian thu lawmawm an nei. Wales winger David Brook chu bench lamah a ṭhu leh thei tawh, cancer vangin nikum aṭang khan a la inkhel leh lo - an match lehpekah erawh an chhawr theih a rinawm.