Tuikual South tan hmun a awm ta lo

Tualchhung basketball inelna - Mizoram Super League a nih tawh chuan Tuikual South thawm a ring a, fans an neih tam avangin boruak pawh an siam ṭhin. Kumin erawh Phengphehlep tan season duhawm lo a ni.

MSL8 league round an khel zo hnai, khelh hmabak match khat ṭheuh an la nei. Team hlun Tuikual South tan semifinal lut turin beisei a awm tawh lo, an zahawmna humhim turin Thawhlehni tlaiah Bungkawn LB Associates hneh an tum ang.

Mizoram Super League season hmasa berah semifinal an siam lo, a sang pahnihin final an khel - Phengphehlep hi pathumna an ni. A hnu lamah erawh a sang pali zingah an tel ngar ngar, kuminah an record duhawm tak hi an humhim thei ta lo.

TKS hian chak ngei ngei an ngaihna inkhelah Mission Veng Hotshots chu 87-76 in an hneh lo. Hnehna changtu Hotshots hian semifinal khel turin pathumnaah an dinhmun an sawhnghet nghal thung a ni.

Tuikual South captain F. Zodinthara chuan, "Semifinal kan khel phak lo tur hi a uiawm khawp mai, a chhan hrang hrang awm thei zingah season tir lam kan khel chhe lutuk kha a pawi ta a ni," tiin Vanglaini a hrilh.

MSL8-ah hian team pariat an inel a, vawi hnih ṭheuh an inkhelh kual hnuah a sang paliin semifinal an khel dawn. Champion lai Zarkawt BCA, Khatla TBL leh Mission Veng Hotshots te dinhmun a chiang tawh.

Kai thar Bungkawn LB chu palina an ni mek a, tlang turin an match hnuhnung bera nasa taka chak loh a tawk. An chak lo a nih pawhin inkhel danga Chanamri Vikings leh MSV Hotshots inkhel result a zirin an la tlang thei tho.

Semifinal chin hi best of three series hmanga inelna neih a ni dawn. Semifinal match hmasa ber chu March 16, Ningani zan hian khelh ṭan nghal a ni dawn - match zawng zawng hi R. Dengṭhuama Indoor Stadium, Mualpuia khelh a ni.