Man City-in Arsenal an hnaih

Manchester City-in Premier League nomawi chan mai an tum lo a, Pep Guardiola hote hian Inrinni zan khan Crystal Palace chu 1-0 in an hneh. Goal awmchhun hi minute 78-naah Erling Haaland-a'n penalty aṭangin a khung.

Selhurst Park-ah City-in goal an khung harsat. Rodri volley kawh zet chu Vicente Guaita-a'n a dang hman! Jack Grealish-a'n goal pawnah chiah a pet a, Haaland pawhin hnai tak aṭangin a hlah. Phil Foden-a'n freekick aṭangin a khung thei lo a, Julian Alvarez pawhin mawi zetin chance insiam mah se goal-ah a khung thei lo.

A tawpah City an vannei a, Michael Olise-a'n ṭul lo takin box chhungah Ilkay Gundogan a titlu a, penalty a chawi. Haaland rawn ding chhuakin chiang takin a pet goal.

Pep Guardiola hoten khel-mualah harsatna tawk deuh mah se point thum an hlawhchhuah avangin Arsenal 'pressure' an pe. Gunners hian nizan khan Fulham an hmachhawn a, result kan hre hman lo.

Inkhel dangah Chelsea-in hnehna an chang a, Leicester City chu 3-1 in an hneh. Blues tan Ben Chilwell, Kai Havertz leh Mateo Kovacic ten goal an khung. Graham Potter hote hian sawisel hlawh deuh mah se match thum an chak zawn tawh a, UCL-ah quarterfinal an lut tawh bawk.

Tottenham Hotspur pawh an insiamṭha a, Anontio Conte hoten Nottingham Forest 3-1 in an hneh. Harry Kane-a'n goal hnih a khung bakah Son Heung-min-a'n goal khat a khung a, Spurs-in UCL khelh an tum tih a chiang.

Conte chuan, "Kan ṭan ho ṭhat a ṭul. Dawhtheihna leh hun ka mamawh. Club-in dawhtheihna an nei a, fan-te erawhin dawhtheihna an nei tawh lo. Ni hnih khat chhungin team a din theih loh," tiin fan-te chu a chunga rinna nghat leh turin a ngen.