Mohun Bagan mikhual tur Hyderabad

Zanin dar 7:30 hian ATK Mohun Bagan-in Salt Lake Stadium-ah Hyderabad an mikhual dawn. Indian Super League semifinal first leg-ah goal a lut lo a, second leg-ah hian chinfel a ni dawn. Nizan khan semifinal hmasa zawkah Bengaluru FC-in Mumbai City an mikhual a, result kan hre hman lo.

Gachibowli Stadium-ah first leg khelh a ni a, Mohun Bagan tan K. Lalṭhathanga'n (Puitea) bul a ṭan. Hyderabad lamah Lalrinliana Hnamte chu bench aṭangin a lut ve bawk. Season pangngaiah champion lai Hyderabad hi pahnihna an ni a, an mualah an chak zawh loh avangin semifinal-ah erawh Mohun Bagan buk a rit ta hret zawk.

League round-ah team pahnih hi an mualah 1-0 ve ve a an chak avangin an intluk tawk tih erawh a chiang. Bagan keeper Vishal Kaith hian tun season-ah save a ngah ber a, defender Asish Rai leh Pritam Kotal te chu interception ngah pakhatna leh pahnihna an ni bawk.

Bagan tlarhnung a phui ṭha a, chutihrualin an khingpui Hyderabad tlarhnung a phui ve tho - vawi 11 ve ve clean sheet an nei. Second leg-ah pawh team pahnih an fimkhur a rinawm a, chutihrualin goal a lut lo a nih pawhin penalty shootout hmanga chak zawk zawn a nih dawn avangin inkhel a hmuhnawm lo thei lo a ni.