Mellung hlu bik phuntu Messi

Lionel Messi chuan goal khung chauh ni loin ṭhiante khung tur siamsak pawh a thiam chungchuang tih a lantir zel. Messi hian Inrinni zan khan Kylian Mbappe goal khung tur a siamsak a, club football huanga assist vawi 300 a neih tlinna a ni.

Paris Saint Germain hi Brest nen 1-1 in an inhnehtawk reng a, hun tawp dawnah Messi hian mual laia ball lir lai chu dang ding loin a hmaa awm Mbappe tan a pass zui a, ani hian rang zetin 2-1 a an chakna goal atan a khung zui.

Barcelona leh PSG tan Messi hian assist a neih zat belhkhawm chu 300 a ni a, hetiang ti thei player awmchhun a ni. An ram Argentina tana assist a neih nen belhkhawm chuan, a ṭhiante khung tur vawi 353 a siamsak tawh.

Champions League-ah Bayern Munich hneh loin PSG an tla hlim an ni a, an tan chuan Ligue 1 lama hnehna chan hi thil lawmawm a ni ang. Match 27 aṭanga point 66 hmuin pahnihna Marseille aiin point 11-in an sang zawk.

PSG coach Chistophe Galtier chuan, "UCL aṭanga kan tlak avang khan kan lungngai a, kan thinur bawk. Mahse, inpumkhat takin Ligue 1 kan khel chhunzawm thei a, league nomawi chawi ngei kan tum dawn a ni," a ti.

Ligue 1-ah chuan PSG hi an champion leh ngei a rinawm. Mahse, club neitu lamin an duh ber chu Champions League a ni a, an hlawhtlin theih loh avangin Messi leh Mbappe te contract bakah coach dinhmun thlengin nipui bazar ti ngaihnawm tu an ni ngei ang.