El Clasico hmain Real an chak

Real Madrid chuan Inrinni zan khan Espanyol chu 3-1 in an hneh a, point thum hlu tak avangin La Liga-ah Los Blancos hian champion an beisei chhunzawm zel. Carlo Ancelotti hote hian March 15, Nilaini zan hian Liverpool an mikhual dawn a, March 20, Pathianni zanah Barcelona hmachhawn turin Nou Camp-ah an lenglut leh bawk ang.

Carlo Ancelotti-a'n left back-ah Eduardo Camavinga a hmang a, French midfielder hi Ruben Sanchez-a'n chiang taka bum avangin Espanyol tan Joselu-a'n minute riatna lekah goal hmahruai a khung phah.

Real hian inhliam vangin Karim Benzema an chhawr thei lo a, amaherawhchu first half-ah vek Vinicius Jr leh Eder Militao te hmangin siphurh an sut. Mualneitu tan Marco Asensio-a'n injury time-ah chak nemnghehna goal a khung leh bawk.

Ancelotti hoten result ṭha an nei a, an elpui Barca erawhin khelmual pawnah chanchin duhawm lo an nei. Catalan club hian 2001 leh 2018 chhung khan Spain referees committee vice president Jose Maria Enriquez Negreira chu euro maktaduai 8.4 (£7.4m) an pe a ni.

Thla liam ta khan La Liga chief executive Javier Tebas chuan president nilai mek Joan Laporta hi a insawifiah thei lo a nih chuan bang rawh se, tiin a sawi hial. Laporta chuan, "Barca hian referee kan tham ngai lo, referee tham tumna rilru pawh kan nei ngai lo," tiin a chhanglet.

Negreira-Barcelona scandal chungchangah hian Real president Florentino Perez chuan club board of directors te nen meeting a ko nghal a, Catalan club buaina hi a la lian chho dawn chauh niin a lang.